ജയറാം നായകനായ വെറുതെ ഒരു ഭാര്യ എന്ന ചിത്രത്തിൽ ജയറാമിന്റെ മകളായി അഭിനയം ആരംഭിച്ച് ആദ്യ ചിത്രത്തിലൂടെ തന്നെ മികച്ച ബാലതാരത്തിനുള്ള അവാർഡ് കരസ്ഥമാക്കിയ നടിയാണ് നിവേദ തോമസ്. തെലുങ്കിലും തമിഴിലും മലയാളത്തിലുമായി കൈനിറയെ ചിത്രങ്ങളാണ് താരത്തിനിപ്പോൾ ഉള്ളത്. വെറുതെ ഒരു ഭാര്യക്ക് ശേഷം ചാപ്പാ കുരിശ്, പോരാളി, റോമൻസ്, ജില്ല, പാപനാസം, ജന്റിൽമാൻ, നിന്നു കോരി, ജയ് ലവ കുശ, 118, ദർബാർ, വി, വക്കീൽ സാബ് തുടങ്ങിയ ചിത്രങ്ങളിലും നിവേദ പ്രധാന കഥാപാത്രങ്ങളെ അവതരിപ്പിക്കുകയുണ്ടായി.
ജനിച്ചത് ചെന്നൈയിൽ ആണെങ്കിലും കേരളത്തിലെ ഇരിട്ടിയിലാണ് നിവേദയുടെ കുടുംബവേരുകൾ ഉള്ളത്. ആർകിടെക്ച്ചറിൽ ബിരുദമുള്ള നിവേദ മലയാളം, തെലുങ്ക്, തമിഴ്, ഫ്രഞ്ച്, ഹിന്ദി, ഇംഗ്ലീഷ് തുടങ്ങിയ ഭാഷകൾ മനോഹരമായി സംസാരിക്കും. സൺ ടിവിയിലെ മൈ ഡിയർ ഭൂതം എന്ന സീരിയലിൽ ബാലതാരമായിട്ടാണ് നിവേദ അഭിനയം ആരംഭിച്ചത്. അതിന് പിന്നാലെയാണ് വെറുതെ ഒരു ഭാര്യയിൽ അഭിനയിച്ചത്. തുടർന്ന് തമിഴിലും മലയാളത്തിലും ചെറിയ റോളുകൾ ചെയ്തിരുന്ന നടിക്ക് സാമുതിരക്കനി ഒരുക്കിയ പോരാളിയിലെ റോൾ ഏറെ ശ്രദ്ധ നേടിക്കൊടുത്തു. ദൃശ്യത്തിന്റെ തമിഴ് റീമേക്കായ പാപനാസത്തിൽ മലയാളത്തിൽ അൻസിബ അവതരിപ്പിച്ച കഥാപാത്രത്തെയാണ് നിവേദ അവതരിപ്പിച്ചത്.
2016ൽ നാനി നായകനായ ജന്റിൽമാനിലൂടെയാണ് നിവേദ തെലുങ്കിലേക്ക് അരങ്ങേറ്റം കുറിച്ചത്. നാനിയുടെ തന്നെ നിന്നു കോരിയിൽ നായികയായ താരം ജൂനിയർ എൻ ടി ആറിന്റെ നായികയായി ബോക്സോഫീസ് സൂപ്പർഹിറ്റ് ചിത്രം ജയ് ലവ കുശയിലും അഭിനയിച്ചു. 2020ൽ രജനികാന്തിന്റെ മകളായി തമിഴ് ചിത്രം ദർബാറിൽ അഭിനയിച്ച നിവേദ അമിതാഭ് ബച്ചന്റെ പിങ്ക് എന്ന തമിഴ് ചിത്രത്തിന്റെ തെലുങ്ക് റീമേക്ക് വക്കീൽ സാബിൽ പവൻ കല്യാണിനൊപ്പവും അഭിനയിച്ചു. മീറ്റ് ക്യൂട്ട്, ശാകിനി ദാകിനി എന്നീ തെലുങ്ക് ചിത്രങ്ങളാണ് താരത്തിന്റെ പുതിയതായി ഒരുങ്ങുന്നത്.
സോഷ്യൽ മീഡിയയിലും ഏറെ സജീവമായ താരം തന്റെ വിശേഷങ്ങൾ എല്ലാം തന്നെ സോഷ്യൽ മീഡിയ വഴി പങ്ക് വെക്കാറുണ്ട്. ഇപ്പോഴിതാ താൻ സ്വയം പശുവിനെ കറന്നെടുത്ത പാൽ കൊണ്ട് ചായ കുടിച്ച സന്തോഷമാണ് താരം പങ്ക് വെച്ചിരിക്കുന്നത്. പശുവിനെ കറക്കുന്ന വീഡിയോയും നിവേദ പങ്ക് വെച്ചിട്ടുണ്ട്.
View this post on Instagram