പ്രേക്ഷകലക്ഷങ്ങൾ ഒന്നാകെ ലാലേട്ടന്റെ ഒടിയൻ റിലീസിനായി ആവേശത്തോടെ കാത്തിരിക്കേ ചിത്രത്തിന്റെ സംവിധായകൻ വി ഏ ശ്രീകുമാർ മേനോന് പരിക്ക്. കഴിഞ്ഞ ദിവസം മുംബൈ എയർ പോർട്ടിൽ വെച്ചാണ് അദ്ദേഹത്തിന് അപകടം സംഭവിച്ചത്. എയർ പോർട്ടിലെ എസ്കലേറ്ററിൽ നിന്ന് വീണ അദ്ദേഹത്തിന്റെ താടിയെല്ലിനാണ് പൊട്ടൽ ഉള്ളത്. അപകടത്തെ തുടര്‍ന്ന് ബെംഗളൂരുവിലെ സ്വകാര്യ ആശുപത്രിയില്‍ എത്തിച്ച അദ്ദേഹത്തെ അടിയന്തിര ശസ്ത്രക്രിയയ്ക്ക് വിധേയനാക്കി. ഇപ്പോൾ അദ്ദേഹത്തിന്റെ ആരോഗ്യനില തൃപ്തികരമാണെന്നും മള്‍ട്ടിപ്പിള്‍ ഫ്രാക്ചറുകള്‍ സംഭവിച്ചതിനാല്‍ നാളെ ഇംപ്ലാന്റ് ശസ്ത്രക്രിയക്കും അദ്ദേഹത്തെ വിധേയനാക്കുമെന്നും ഡോക്ടര്‍മാര്‍ അറിയിച്ചു. ശ്രീകുമാർ മേനോന് സംഭവിച്ച ഈ അപകടം ചിത്രത്തിന്റെ റിലീസിനെ ബാധിക്കുമോ എന്ന ആശങ്കയും സിനിമാ പ്രേമികൾ പങ്കു വെക്കുന്നുണ്ട്.
അതിനിടെ ഇന്നലെ റിലീസായ ഒടിയനിലെ ‘കൊണ്ടൊരാം’ എന്ന ഗാനത്തിന്റെ ലിറിക്ക് വീഡിയോ 10 ലക്ഷത്തിനടുത്ത് യൂട്യൂബ് വ്യൂസുമായി യൂട്യൂബ് ട്രെൻഡിങ്ങിൽ ഒന്നാമതാണ്. റഫീഖ് അഹമ്മദിന്റെ വരികൾക്ക് എം ജയചന്ദ്രൻ ഈണമിട്ട ഗാനം ആലപിച്ചിരിക്കുന്നത് സുദീപ് കുമാറും ശ്രേയ ഘോഷാലും ചേർന്നാണ്. മനോഹരമായ ഒരു ഫീലിംഗ് സമ്മാനിക്കുന്ന ഗാനം ഇതിനകം പ്രേക്ഷകരുടെ ഹൃദയം കവർന്നു കഴിഞ്ഞു. ഡിസംബർ 14നാണ് ഒടിയൻ ലോകമെമ്പാടും തീയറ്ററുകളിൽ എത്തുന്നത്. മുന്നൂറിലധികം ഫാൻസ്‌ ഷോകളുമായി ആരാധകരും പ്രേക്ഷകരും ഒടിയന് വമ്പൻ വരവേൽപ്പ് നൽകാനുള്ള തയ്യാറെടുപ്പുകളിലാണ്.
