പ്രതീക്ഷകൾ ഏറെയോടെയാണ് ഒടിയൻ ഇന്നലെ തീയറ്ററുകളിൽ എത്തിയത്. പക്ഷേ അതിനുമപ്പുറമായിരുന്നു തടസ്സങ്ങളും. അപ്രതീക്ഷിതമായെത്തിയ ഹർത്താലാണ് ആദ്യ തടസ്സമായി മുന്നിൽ നിന്നത്. പക്ഷേ ഹർത്താലിനെ വെല്ലുന്ന കാഴ്ച്ചയാണ് തീയറ്ററുകളിൽ കണ്ടത്. ഹർത്താൽ ആണെന്ന ഒരു സൂചന പോലും തരാത്ത വിധം തീയറ്ററുകളിൽ ആള് നിറഞ്ഞു. ചിത്രത്തെ ഡീഗ്രേഡ് ചെയ്യാൻ തന്നെ കരുതിക്കൂട്ടിയിറങ്ങിയ ചിലർ നടത്തിയ നീക്കങ്ങളും ഒടിയന് മുന്നിൽ തടസമായി നിന്നു. ആ തടസങ്ങളെല്ലാം തരണം ചെയ്‌ത ഒടിയന് രണ്ടാം ദിനവും അഭൂതപൂർവമായ തിരക്കാണ് തീയറ്ററുകളിൽ കാണാൻ കഴിയുന്നത്.
ഇപ്പോഴിതാ ഒടിയന്റെ ആദ്യദിന കളക്ഷൻ പുറത്തു വിട്ടിരിക്കുകയാണ് ചിത്രത്തിന്റെ അണിയറപ്രവർത്തകർ. ആദ്യദിന ഇന്ത്യൻ ഗ്രോസ്സാണ് ഇപ്പോൾ പുറത്തുവിട്ടിരിക്കുന്നത്. 16.48 കോടിയാണ് ആദ്യദിനം ഇന്ത്യയിൽ നിന്നും മാത്രമായി ചിത്രം നേടിയിരിക്കുന്നത്. 9.54 കോടി ആദ്യദിനം ഓൾ ഇന്ത്യ ഗ്രോസ് നേടിയ കായംകുളം കൊച്ചുണ്ണിയുടെ റെക്കോർഡാണ് ഒടിയൻ തകർത്തത്. കേരള ഗ്രോസ് അണിയറപ്രവർത്തകർ പുറത്തുവിട്ടിട്ടില്ല. 7 കോടിയോളമാണ് കേരള ഗ്രോസ് ഒരു റിപ്പോർട്ട് സോഷ്യൽ മീഡിയയിൽ പടരുന്നുണ്ട്.
