മലയാള സിനിമ കണ്ട ഏറ്റവും വലിയ ബ്രഹ്മാണ്ഡ റിലീസിനൊരുങ്ങുകയാണ് ശ്രീകുമാര്‍ മേനോന്റെ ഒടിയന്‍. മോഹന്‍ലാല്‍ നായകനായെത്തുന്ന ചിത്രം ഡിസംബര്‍ പതിനാലിന് തിയേറ്ററുകളിലെത്തും.ആരാധകര്‍ പ്രതീക്ഷയോടെ കാത്തിരിക്കുന്ന ചിത്രമായതിനാ‍ല്‍ കേരളത്തില്‍ റിലീസ് ചെയ്യുന്നതിനൊപ്പം ഗള്‍ഫിലും അമേരിക്കയിലും ബ്രിട്ടനിലും യൂറോപ്പിലും ഓസ്‌ട്രേലിയയിലും ഒടിയന്‍ എത്തും.
ഇതിനിടയിൽ പുതിയൊരു റെക്കോർഡ് കൂടി ഒടിയനെ തേടി എത്തിയിരിക്കുകയാണ്. ഇന്ത്യയിൽ സിനിമാ പ്രേമികൾ കാത്തിരിക്കുന്ന സിനിമകളുടെ പട്ടികയിൽ ഒന്നാം സ്ഥാനത്ത് എത്തിയിരിക്കുകയാണ് ഒടിയൻ ഇപ്പോൾ.ഐ.എം.ഡി. ബി ആണ് പട്ടിക തയ്യാറാക്കിയത്.ബ്രഹ്മാണ്ഡ ചിത്രം 2.0യെ പിന്തള്ളിയാണ് ഒടിയൻ ഒന്നാം സ്ഥാനത്ത് എത്തിയത്.
ബോളിവുഡ് ബിഗ് ബജറ്റ് ചിത്രമായ ഷാരൂഖ് ഖാന്റെ സീറോ, കന്നഡ സിനിമയിലെ ബ്രഹ്മാണ്ഡ ബഹുഭാഷാ ചിത്രമായ കെ ജി എഫ് എന്നിവയെല്ലാം ഒടിയൻ നടത്തിയ പടയോട്ടത്തിൽ പിന്നിലായി. ആദ്യമായാണ് ഒരു മലയാള ചിത്രം ഈ ലിസ്റ്റിലെ ആദ്യ പത്തിൽ വരുന്നത് എന്നിരിക്കെ ഒരു മലയാള ചിത്രം ഈ ലിസ്റ്റിൽ ഒന്നാമത് എത്തുക എന്നത് അത്ഭുതകരമായ കാര്യമാണ്.
