ഒമർ ലുലു ആക്ഷൻ ചിത്രം ഒരുക്കാൻ പോകുന്നുവെന്ന വാർത്തകൾ കേട്ടപ്പോൾ മുതലേ ആരായിരിക്കും നായകൻ എന്നൊരു ചർച്ച സോഷ്യൽ മീഡിയയിൽ ഉയർന്നിരുന്നു. മമ്മുക്കയുടെ പേരാണ് കൂടുതലും പറഞ്ഞു കേട്ടത്. പക്ഷേ മമ്മുക്ക അല്ല നായകൻ എന്ന് പിന്നീട് വെളിപ്പെടുത്തിയിരുന്നു. അപ്പോൾ പിന്നെ ആരായിരിക്കും നായകൻ? ആ ചോദ്യത്തിന് ഇതാ ഉത്തരം… ബാബു ആന്റണി..! സംവിധായകൻ ഒമർ ലുലു തന്നെയാണ് ഇക്കാര്യം പുറത്തു വിട്ടത്.
ഒമർ ലുലുവിന്റെ ഫേസ്ബുക്ക് പോസ്റ്റ്
“പവർ സ്റ്റാർ” AN OMAR MASS
എൺപതുകളുടെ അവസാനത്തിൽ വില്ലനായ് വന്ന് മലയാളികളെ ഞെട്ടിച്ച നടനാണ് ബാബു ആന്റണി. പിന്നീട് തൊണ്ണൂറുകളിൽ നായകനായ് മാറി, മലയാളികൾ അതുവരെ കാണാത്ത കണ്ണഞ്ചിപ്പിക്കുന്ന ആക്ഷൻ രംഗങ്ങളാൽ ഏവരെയും പുളകം കൊള്ളിച്ച് അദ്ദേഹം താരപദവി നേടി. ചെറുപ്പം മുതൽ അദ്ദേഹത്തിന്റെ ആക്ഷൻ സിനിമകളുടെ വലിയ ആരാധകനായിരുന്നു ഞാൻ .ഇപ്പോൾ സംവിധായകൻ ആയപ്പോൾ ബാബു ആന്റണിയെ വച്ച് ഒരു മാസ്സ് ആക്ഷൻ പടം ചെയ്യുക എന്ന ആഗ്രഹം അങ്ങനെ സംഭവിക്കാൻ പോവുകയാണ്. പടം നിർമ്മിക്കുന്നത് മാസ്റ്റർപീസിന്റെ പ്രൊഡ്യൂസറായ CH മുഹമ്മദാണ്. Satellite Value പോലും നോക്കാതെ ഈ ചിത്രം വലിയ കാൻവാസിൽ നിർമ്മിക്കാൻ മുന്നോട്ട് വന്ന അദ്ദേഹം തരുന്ന കരുത്ത് ചെറുതല്ല. ത്രസിപ്പിക്കുന്ന സംഘട്ടന രംഗങ്ങൾ കൊണ്ട് തീർക്കുന്ന മെഗാമാസ്സ് ചിത്രമായിരിക്കും “പവർ സ്റ്റാർ” 2019ൽ ഷൂട്ട് തുടങ്ങും ❤
Babu Antony will be Back in high voltage action through “POWERSTAR” ….AN OMAR MASS Need all your support & prayers ?
ഭരതൻ ചിത്രമായ ചിലമ്പിലൂടെ അഭിനയരംഗത്തേക്ക് എത്തിയ ബാബു ആന്റണി കൂടുതലും വില്ലൻ വേഷങ്ങളിലാണ് അഭിനയിച്ചിട്ടുള്ളത്. ഭരണകൂടം, ഗാന്ധാരി, ചന്ത, ദാദ, കടൽ, കമ്പോളം തുടങ്ങിയ ചിത്രങ്ങളിലെ അദ്ദേഹത്തിന്റെ അസാമാന്യ ആക്ഷൻ രംഗങ്ങൾ അന്ന് കാണികളെ ചെറുതായിട്ടൊന്നുമല്ല ത്രസിപ്പിച്ചിട്ടുള്ളത്. വീണ്ടും അത്തരത്തിൽ ഒരു കാഴ്‌ച ഒമർ ലുലു സമ്മാനിക്കുമെന്ന് പ്രതീക്ഷിക്കുന്നു. നിവിൻ പോളി ചിത്രമായ കായംകുളം കൊച്ചുണ്ണിയിലും പുതിയ വിജയ് ചിത്രത്തിലും ശ്രദ്ധേയമായ വേഷങ്ങൾ ബാബു ആന്റണി കൈകാര്യം ചെയ്യുന്നുണ്ട്. മാർഷ്യൽ ആർട്സിൽ നൈപുണ്യനായ അദ്ദേഹം പിയാനോ എന്ന ചിത്രത്തിലൂടെ സംവിധാനരംഗത്തേക്കും ചുവടുറപ്പിക്കാനുള്ള ഒരുക്കങ്ങളിലാണ്.
