മോഹൻലാൽ അവതാരകനായി ഏഷ്യാനെറ്റിൽ സംപ്രേഷണം ചെയ്ത ബിഗ് ബോസ് സീസൺ വണ്ണിലൂടെ പരിചയപ്പെട്ട് പിന്നീട് ആ സൗഹൃദം വിവാഹത്തിലേക്ക് എത്തിയ രണ്ട് വ്യക്തികളാണ് പേളി മാണിയും ശ്രീനിഷ് അരവിന്ദും. ടെലിവിഷൻ അവതാരകയും നടിയുമായ പേർളി മാണിയും ശ്രീനിഷും വിവാഹം കഴിച്ചിട്ട് ഒരു വർഷം തികഞ്ഞു.
പേളി മാണി ഗർഭിണിയായി എന്ന വാർത്ത കുറച്ചു നാളുകൾക്ക് മുൻപ് പുറത്ത് വന്നിരുന്നു. ഇൻസ്റ്റഗ്രാമിലൂടെ പങ്കുവെച്ച വീഡിയോയിൽ ആണ് പേളിമാണി ഈ സന്തോഷവാർത്ത ആരാധകരെ അറിയിച്ചത്. ഇപ്പോൾ തന്റെ വിശേഷങ്ങൾ ആരാധകരുമായി പങ്കുവെക്കുകയാണ് താരം
പേർളിയുടെ കുറിപ്പ്:
ആദ്യത്തെ മൂന്ന് മാസം കുറച്ച് ബുദ്ധിമുട്ടുകൾ നേരുടേണ്ടി വന്നു. ശർദ്ദിയും ഗർഭകാല അസ്വസ്ഥതകളും ഉണ്ടായിരുന്നു. എന്നാൽ രണ്ടാമത്തെ ട്രൈമസ്റ്റർ വളരെ അധികം സന്തോഷം നൽകുന്ന ഒന്നാണ്. വളരെയധികം ഉന്മേഷം തോന്നുന്നു. പാചകം, വൃത്തിയാക്കൽ ഡ്രൈവിങ് എല്ലാം എനിക്കിഷ്ടമാണ്. ചെറിയ ഇളക്കങ്ങളിലൂടെ കുഞ്ഞ് എന്നോട് ഹായ് പറയുന്നുണ്ട്. ഞാൻ പാടുകയും പാട്ട് കേൾക്കുകയും ചെയ്യാറുണ്ട്. ഒപ്പം ചെറിയ പ്രാർത്ഥനകളും നടത്താറുണ്ട്. എന്റെ കൈകൾ എപ്പോഴും എന്റെ കുഞ്ഞ് വയറിന് മേലാണ് ഉണ്ടാവാറെന്ന് ഞാൻ മനസ്സിലാക്കി. എന്നിലെ മാതൃത്വം ഉണർന്നിട്ടുണ്ട്. അതുകൊണ്ട് കുഞ്ഞിനെ എപ്പോഴും സേഫായി ഇരിക്കണെ എന്നാണ് എന്റെ ചിന്ത.
റിയാലിറ്റി ഷോ സെറ്റിൽ വെച്ച് പരസ്പരം പ്രണയം തുറന്നു പറഞ്ഞ ഇരുവരുടെയും വിവാഹം കേരളക്കര ഒന്നാകെ ഉറ്റുനോക്കിയ ചടങ്ങ് ആയിരുന്നു. റിയാലിറ്റി ഷോയ്ക്ക് വേണ്ടി വെറും ഒരു ഗെയിം കളിക്കുകയാണോ എന്നുവരെ ആരാധകർ സംശയിച്ചിരുന്നു. എന്നാൽ മതത്തിന്റെ വേലിക്കെട്ടുകൾ തകർത്തെറിഞ്ഞ് ഇരുവരും വിവാഹിതരായി. 2019 ജനുവരിയിൽ വിവാഹനിശ്ചയവും 2019 മെയ് 5, 8 തീയതികളിലായി ഹിന്ദു ക്രിസ്ത്യൻ ആചാരപ്രകാരമുള്ള വിവാഹങ്ങളും ഇവർ നടത്തി. ആരാധകരുമായി എപ്പോഴും തങ്ങളുടെ വിശേഷങ്ങൾ പങ്കു വയ്ക്കുവാൻ ശ്രമിക്കുന്ന താരങ്ങളാണ് ഇരുവരും.
