കറുത്തമുത്തിലെ ഡിസിപി അഭിറാം എന്ന കഥാപാത്രത്തിലൂടെ മിനിസ്‌ക്രീന്‍ പ്രേക്ഷകര്‍ക്ക് പ്രിയങ്കരനാണ് പ്രദീപ്. ബിഗ്ബോസ് മലയാളം സീസണ്‍ ഒന്നില്‍ മത്സരാര്‍ത്ഥി ആയും പ്രദീപ് എത്തിയിരുന്നു. ബിഗ്ബോസില്‍ എത്തിയതോടെ താരത്തെ കുറിച്ച് കൂടുതല്‍ പ്രേക്ഷകര്‍ മനസിലാക്കുകയും ചെയ്തു. ലോക്ക്ഡൗണ്‍ സമയത്താണ് പ്രദീപും അനുപമ രാമചന്ദ്രനും തമ്മില്‍ വിവാഹം കഴിക്കുന്നത്. ലോക്ക്ഡൗണ്‍ നിയന്ത്രണങ്ങളെല്ലാം പാലിച്ച് അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിലായിരുന്നു വിവാഹം. തിരുവനന്തപുരം ഇന്‍ഫോസിസില്‍ ജോലി ചെയ്യുകയാണ് അനുപമ.
ഇരുവര്‍ക്കും ഏപ്രിലിലാണ് ആണ്‍കുഞ്ഞ് ജനിച്ചത്. ഇപ്പോഴിതാ മകന്റെ പേരിടീല്‍ നടത്തിയ കാര്യം പങ്കു വെച്ചിരിക്കുകയാണ് താരം. തന്റെ അഭിനയ ജീവിതത്തില്‍ ഒരിക്കലും മറക്കാനാവാത്ത പേരാണ് കുഞ്ഞിന് നല്‍കിയതെന്ന് പ്രദീപ് ചന്ദ്രന്‍ പറഞ്ഞു. ”കറുത്തമുത്ത്” എന്ന പരമ്പരയിലെ ”അഭിറാം IPS’ എന്ന കഥാപാത്രമാണ് താരത്തെ മാറ്റിമറിച്ചത്, അതുകൊണ്ട് തന്നെ മകന് അഭിറാം എ പി എന്നാണ് പേര് നല്‍കിയതെന്നും പ്രദീപ് ചന്ദ്രന്‍ ഫേസ്ബുക്കില്‍ കുറിച്ചു.
