തിരക്കഥാകൃത്തായ സച്ചി ആദ്യമായി സംവിധാനം ചെയ്ത് പ്രിഥ്വിരാജും ബിജു മേനോനും ഒന്നിച്ച് അഭിനയിച്ച ചിത്രമാണ് 2015 ൽ പുറത്തിറങ്ങിയ അനാർക്കലി. നാലു വർഷത്തെ ഇടവേളയ്ക്കു ശേഷം മൂവരും വീണ്ടും ഒന്നിക്കുകയാണ് പുതിയ ചിത്രത്തിലൂടെ. അനാർക്കലിയിലെ പ്രധാന വേഷങ്ങൾ അവതരിപ്പിച്ചിരുന്ന പൃഥ്വിരാജും ബിജുമേനോനും ഏറെ പ്രേക്ഷകശ്രദ്ധ നേടിയിരുന്നു. ‘അയ്യപ്പനും കോശിയും’ എന്നാണ് പുതിയ ചിത്രത്തിന്റെ പേര്. ചിത്രം നിർമ്മിക്കുന്നത് രഞ്ജിത്താണ്.
അട്ടപ്പാടിയുടെ പശ്ചാത്തലത്തിലൊരുങ്ങുന്ന ചിത്രത്തില്‍ 17 വര്‍ഷം സേവനമനുഷ്ഠിച്ച ഒരു റിട്ടയര്‍ഡ് ഹവില്‍ദാറായി പൃഥ്വിരാജ് വേഷമിടുമ്പോൾ, ബിജു മേനോന്‍ നാട്ടിലേക്ക് സ്ഥലം മാറ്റം ലഭിച്ചെത്തുന്ന വിരമിയ്ക്കാറായ പൊലീസ് കോണ്‍സ്റ്റബിളായി വേഷമിടുന്നു.ഇരുവരും തമ്മിലുള്ള ഈഗോയുടെ കഥയാണ് ചിത്രം കൈകാര്യം ചെയ്യുന്നത്. ബ്രദേഴ്സ് ഡേ, ഡ്രൈവിംഗ് ലൈസൻസ് എന്നീ ചിത്രങ്ങളിലാണ് പൃഥ്വിരാജ് ഇപ്പോൾ അഭിനയിച്ചുകൊണ്ടിരിക്കുന്നത്. ജി പ്രജിത്ത് സംവിധാനം ചെയ്യുന്ന ‘സത്യം പറഞ്ഞാല്‍ വിശ്വസിക്കുമോ’ ആണ് ബിജു മേനോന്റെ റിലീസിനൊരുങ്ങുന്ന ചിത്രം .
