ക്ലബ് എഫ്.എമ്മിന്റെ സ്റ്റാർ ജാം വിത് റാഫി എന്ന പരിപാടിയിൽ സംസാരിക്കവേ ബിജു മേനോനെ ചൂണ്ടിക്കാട്ടി പ്രിഥ്വിരാജ് പറഞ്ഞ വാക്കുകൾ ഇപ്പോൾ വൈറലാവുകയാണ്. മലയാളത്തിലെ ഏറ്റവും വലിയ സിനിമയിലെ ഒരു കേന്ദ്രകഥാപാത്രം മലയാളത്തിലെ ഏറ്റവും വലിയ സംവിധായകൻ ഓഫർ ചെയ്തിട്ട് കുതിര ഓടിക്കണമെന്ന ഒറ്റ കാരണം കൊണ്ട് ആ സിനിമ വേണ്ടെന്ന് വച്ച മഹാനാണ് ഈ ഇരിക്കുന്നത് എന്നാണ് ബിജുമേനോനെ കുറിച്ച് പൃഥ്വിരാജ് പറഞ്ഞത്. പരിപാടിയിൽ ചിരി പടക്കത്തിന് ആയിരുന്നു ഇരുവരും തിരികൊളുത്തിയത്. ബിജുമേനോൻ മടിയൻ ആണോ എന്ന അവതാരകന്റെ ചോദ്യത്തിന് അല്ല എന്ന് ബിജുമേനോൻ ഉത്തരം നൽകിയപ്പോൾ അതെ എന്നാണ് പൃഥ്വിരാജ് പറഞ്ഞത്.
തിയേറ്ററുകളിൽ മികച്ച പ്രേക്ഷക സ്വീകാര്യതയോടെ മുന്നേറുന്ന സച്ചി സംവിധാനം ചെയ്ത അയ്യപ്പനും കോശിയും എന്ന ചിത്രത്തിന്റെ പ്രമോഷനായി ആണ് ഇരുവരും പരിപാടിയിൽ പങ്കെടുത്തത്. തനിക്ക് 50 വയസ്സായി എന്നും നിവൃത്തിയില്ലാതെ ഇടി കൊണ്ടതാണ് ഈ പടം എന്നും പറയുന്ന ബിജുമേനോൻ സംവിധായകൻ സച്ചി സിനിമയുടെ കഥയും സീനുകളും പറഞ്ഞപ്പോൾ തന്നെ ആക്ഷൻ രംഗങ്ങളുടെ കാര്യത്തിൽ തനിക്ക് സംശയമുണ്ടായിരുന്നുവെന്നും അത് സച്ചിയോട് പങ്കുവച്ചിരുന്നുവെന്നും പറയുന്നു. ജീവിതത്തിൽ തികച്ചും സംതൃപ്തനായ ഒരു വ്യക്തിയാണ് ബിജുമേനോൻ എന്നും അതുകൊണ്ട് തനിക്ക് പലപ്പോഴും അദ്ദേഹത്തോട് അസൂയ തോന്നിയിട്ടുണ്ട് എന്നും പൃഥ്വിരാജ് പറഞ്ഞു.
