മമ്മൂട്ടിയെ നായകനാക്കി ‘ഡാഡി കൂൾ’ എന്ന സിനിമയിലൂടെ സംവിധായകനായ ആഷിഖ് അബു ഇതാ മോഹൻലാലിനെ നായകനാക്കി ചിത്രം ഒരുക്കുന്നു. ചിത്രത്തിന്റെ നിർമാതാവ് തന്നെയാണ് ഇത് സംബന്ധിച്ച് സൂചനകൾ പുറത്തുവിട്ടത്. അതു മാത്രമല്ല മോഹൻലാലിന് ഒപ്പം ചിത്രത്തിൽ ടോവിനോ തോമസ്, സൗബിൻ ഷാഹിർ എന്നിവരും ഉണ്ടാകുമെന്ന സൂചനയും നിർമാതാവ് സന്തോഷ് ടി കുരുവിള നൽകുന്നു.
ആശീർവാസ് സിനിമാസ് ഒരു നിർമാണ പങ്കാളി ആയിരിക്കുമെന്നുള്ള സൂചനയും സോഷ്യൽ മീഡിയയിൽ പങ്കുവെച്ച കുറിപ്പിലൂടെ അദ്ദേഹം നൽകുന്നു. സൗബിൻ ഷാഹിർ, ടോവിനോ തോമസ്, ആഷിഖ് അബു, മോഹൻലാൽ എന്നിവർക്ക് ഒപ്പമുള്ള ചിത്രം പങ്കുവെച്ചാണ് ഇദ്ദേഹം ഇങ്ങനെ കുറിച്ചത്. ഇത്തരത്തിൽ ഒരു ചിത്രം കുറിപ്പോടു കൂടി എത്തിയതിന് ആരാധകരും വലിയ പിന്തുണയാണ് കമന്റ് ബോക്സിൽ നൽകിയിരിക്കുന്നത്.
നിലവിൽ ഒന്നിലധികം ചിത്രങ്ങളുടെ പണിപ്പുരയിലാണ് ആഷിഖ് അബു. ടോവിനോ തോമസ് നായകനായ നാരദൻ, പൃഥ്വിരാജ് – കുഞ്ചാക്കോ ബോബൻ എന്നിവർ ഒന്നിക്കുന്ന നീല വെളിച്ചം എന്നിവയാണ് ഇനി വരാനിരിക്കുന്ന ആഷിഖ് അബു ചിത്രങ്ങൾ. ഹർഷദ് ഒരുക്കുന്ന ഹാഗറും വിനായകൻ ഒരുക്കുന്ന പാർട്ടിയും നിർമിക്കുന്നതും ആഷിഖ് അബുവാണ്. അതേസമയം, മോഹൻലാലിനെ നായകനാക്കി ആഷിഖ് അബു ഒരുക്കുന്ന ചിത്രം സംഭവിക്കുമെന്ന പ്രതീക്ഷയിലാണ് ആരാധകരും പ്രേക്ഷകരും.
