ശ്യാം പുഷ്‌കരന്റെ രചനയിൽ മധു സി നാരായണൻ ഒരുക്കിയ കുമ്പളങ്ങി നൈറ്റ്സ് ഈ വർഷത്തെ വലിയ വിജയങ്ങളിൽ ഒന്നായിരുന്നു. സൗബിൻ, ഷൈൻ നിഗം, ഫഹദ് ഫാസിൽ, ശ്രീനാഥ് ഭാസി തുടങ്ങിയവർ വളരെ മികവുറ്റ പ്രകടനമാണ് ചിത്രത്തിൽ കാഴ്ചവച്ചത്. ചിത്രത്തിലെ പല ഡയലോഗുകളും സോഷ്യൽമീഡിയയും ആരാധകരും ഏറ്റെടുത്തിരുന്നു. അത്തരത്തിൽ പ്രേക്ഷകർ ഒന്നടങ്കം ഏറ്റെടുത്ത ഒരു ഡയലോഗ് ആയിരുന്നു പൊളി ശരത്തെ ട്രാക്ക് മാറ്റ് എന്നത്. ബോബിയുടെയും പ്രശാന്തിന്റെയും കഥാപാത്രങ്ങൾ ബാറിൽ ഇരിക്കുമ്പോൾ ആണ് പൊളി ശരത്തിന്റെ എൻട്രി എങ്കിലും പൊളി ശരത്തിനെ കാണിക്കുന്നില്ല.
ഷൈൻ നിഗത്തിന്റെ കൈ കൊണ്ടുള്ള ഒരു പ്രത്യേക ആക്ഷനുമായി പൊളി ശരത്തിനോട്‌ ട്രാക്ക് മാറ്റാൻ കാണിക്കുന്ന സീനാണ് സിനിമയിൽ ഉള്ളത്. പൊളി ശരത്തിനെ ആരും കണ്ടിട്ടില്ലെങ്കിലും ട്രോളന്മാർക്കും ആരാധകർക്കും ഏറെ ഇഷ്ടമാണ് പൊളി ശരത്തിനെ. ഇത് വരെ കണ്ടിട്ടില്ലാത്ത പൊളി ശരത് ആരാണ് എന്നുള്ളത് പറഞ്ഞു കൊണ്ടുള്ള ഒരു സോഷ്യൽ മീഡിയ പോസ്റ്റ് സമൂഹ മാധ്യമങ്ങളിൽ വൈറലാവുകയാണ്. ആക്ഷൻ ഹീറോ ബിജു എന്ന സിനിമയിലെ ഒരു രംഗവുമായി ബന്ധപ്പെടുത്തിയാണ് പൊളി ശരത്തിനെ കണ്ട് പിടിച്ചിരിക്കുന്നത് എന്നാണ് പോസ്റ്റ്. ആക്ഷൻ ഹീറോ ബിജുവിൽ ഒരു രംഗത്തിൽ എത്തുന്ന ശരത് എന്ന് പേരുള്ള കുമ്പളങ്ങി സ്വദേശിയായ ഒരാളുണ്ട് എന്ന് സിനിമ പാരഡിസോ എന്ന ഗ്രൂപ്പിൽ രജിത് ദിവാകർ എന്നൊരാൾ പോസ്റ്റ് ഇടുകയുണ്ടായി. പൊളി ശരത്ത് കുമ്പളങ്ങിയിൽ തന്നെ ഉണ്ട് എന്നാണ് പോസ്റ്റിലൂടെ അറിയുവാൻ സാധിക്കുന്നത്.
