മലയാളിസ്ത്രീ മനസ്സുകളിൽ ഇടം പിടിച്ച പരസ്‌പരം സീരിയലിലെ കഥാപാത്രം കൊണ്ട് പ്രശസ്തിയാർജ്ജിച്ച രേഖ രതീഷ് തന്റെ തിരക്കേറിയ സീരിയൽ ജീവിതത്തിൽ സന്തോഷവതിയാണ്. ലൊക്കേഷനിൽ നിന്നും ലൊക്കേഷനിലേക്കുള്ള യാത്രകൾ ഈ നടിക്ക് ഒരു മടുപ്പുമുളവാക്കുന്നില്ല. ഈ തിരക്കിനിടയിലും തന്റേതായ കുറച്ചു സമയം ഒരു പ്രമുഖ ഓൺലൈൻ മാധ്യമത്തിനായി അവർ നീക്കി വെച്ചു.
രേഖയുടെ വാക്കുകളിലൂടെ..
“എന്റെ അറിവിൽ മലയാളം സീരിയൽ ഇൻഡസ്ട്രിയിലേക്ക് കടന്നുവരുവാൻ പുതുമുഖങ്ങൾക്ക് യാതൊരു ബുദ്ധിമുട്ടുമില്ല. കഴിവുണ്ടോ? അംഗീകരിക്കപ്പെട്ടിരിക്കും. പുതിയ സീരിയലുകൾക്ക് വേണ്ടി ഞാൻ പുതുമുഖങ്ങളെ ഓഡിഷൻ നടത്താറുണ്ട്. പലപ്പോഴും ചിലരുടെ കഴിവുകൾ കണ്ട് ഞാൻ അത്ഭുതപ്പെട്ടിട്ടുണ്ട്. സത്യം പറഞ്ഞാൽ, അവർ കാരണം എന്റെ ജോലി തന്നെ പോകുമോയെന്നും പേടിയുണ്ട്..!”
ഏറെ വിവാദപരമായ കാസ്റ്റിംഗ് കൗച്ചിനെക്കുറിച്ചും നടി തുറന്നു പറഞ്ഞു. “അതിനെ കുറിച്ച് സിനിമയിലൊക്കെ ഉണ്ടെന്ന് കേട്ടിട്ടുണ്ട്. പക്ഷേ ഇതേവരെ അങ്ങനെ ഒരു സമ്പ്രദായം സീരിയൽ രംഗത്ത് ഉള്ളതായി കേട്ടിട്ടില്ല. കഥാപാത്രത്തിന് വേണ്ടി ‘അഡ്‌ജസ്‌റ്റ്മെന്റുകൾ’ നടത്തേണ്ട കാര്യം ഇവിടെയില്ല. അത്തരം ഷോർട്ട് കട്ടുകൾ സീരിയൽ രംഗത്തില്ല.”
