മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്യുന്ന ബ്രഹ്മാണ്ഡ ചിത്രമാണ് റാം. ദൃശ്യം രണ്ടിന് മുമ്പ് തന്നെ ‘റാം’ സിനിമയുടെ ചർച്ചകൾ ആരംഭിച്ചിരുന്നു. ബിഗ് ബജറ്റിൽ ആണ് ചിത്രം ഒരുക്കുന്നത്. അതുകൊണ്ടു തന്നെ കോവിഡ് വ്യാപനത്തെ തുടർന്ന് ചിത്രത്തിന്റെ കൂടുതൽ മുന്നോട്ടുള്ള യാത്രകൾ നിർത്തിവെച്ചിരുന്നു. പിന്നീട് ദൃശ്യം 2, ട്വൽത് മാൻ എന്നീ ചിത്രങ്ങൾ മോഹൻലാൽ – ജീത്തു ജോസഫ് കൂട്ടുകെട്ടിൽ എത്തി. റാം സിനിമയുടെ ഇനിയുള്ള ചിത്രീകരണം ജൂൺ മാസത്തിൽ വീണ്ടും ആരംഭിക്കുമെന്നാണ് റിപ്പോർട്ടുകൾ. മോഹൻലാൽ – ജീത്തു ജോസഫ് കൂട്ടുകെട്ടിൽ ഒരുങ്ങുന്ന നാലാമത്തെ ചിത്രം കൂടി ആയിരിക്കും റാം. ജൂണിൽ യൂറോപ്പിൽ ആയിരിക്കും ഷൂട്ടിംഗ് എന്നാണ് റിപ്പോർട്ടുകൾ.
റാം സിനിമ പൂർത്തിയാക്കിയതിനു ശേഷം മോഹൻലാൽ ജോഷി ചിത്രത്തിൽ ആയിരിക്കും അഭിനയിക്കുക എന്നാണ് പുറത്തുവരുന്ന മറ്റൊരു റിപ്പോർട്ട്. പൊറിഞ്ചു മറിയം ജോസ് സിനിമയുടെ എഴുത്തുകാരൻ ആയിരുന്ന അഭിലാഷ് എൻ ചന്ദ്രൻ ആയിരിക്കും ജോഷി ചിത്രത്തിന്റെ രചന നിർവഹിക്കുക. തിരക്കഥ പൂർത്തിയാകുന്നതിന് അനുസരിച്ച് ആയിരിക്കും ചിത്രീകരണം ആരംഭിക്കുക. ജോഷി ആയിരുന്നു പൊറിഞ്ചു മറിയം ജോസിന്റെയും സംവിധായകൻ.
അതേസമയം, ജീത്തു ജോസഫിന്റെ ഇതുവരെ ഉള്ളതില്‍ ഏറ്റവും ഉയര്‍ന്ന ബജറ്റിലാണ് റാം തയ്യാറാകുന്നത്. അഭിഷേക് ഫിലിംസിന്റെ ബാനറില്‍ രമേഷ് പിള്ള, സുധന്‍ എസ് പിള്ള എന്നിവരാണ് നിര്‍മ്മാണം. ആശിര്‍വാദ് സിനിമാസും മാക്‌സ് ലാബുമാണ് റിലീസ്. ഇന്ദ്രജിത്ത്, സിദ്ദീഖ്, ലിയോണാ ലിഷോയ്, ഇര്‍ഷാദ് എന്നിവരും ചിത്രത്തിലുണ്ട്. ജീത്തു ജോസഫിന്റെ ഇതുവരെയുള്ള ചിത്രങ്ങളിൽ ഏറ്റവും ഉയർന്ന ബഡ്ജറ്റിൽ ചെയ്യുന്ന ചിത്രമാണ് റാം.
