പുതിയ വാഹനം സ്വന്തമാക്കി താരദമ്പതികളായ റിമ കല്ലിങ്കലും ആഷിഖ് അബുവും. ബി എം ഡബ്ല്യൂ 3 സീരിസ് ആണ് സ്വന്തമാക്കിയത്. റിമ കല്ലിങ്കലിന്റെ പേരിലാണ് വാഹനം. കൊച്ചിയിലെ ബി എം ഡബ്ല്യു വിതരണക്കാരായ ഇ വി എം ഓട്ടോക്രാഫ്റ്റിൽ നിന്നാണ് പുതിയ കാർ റിമ സ്വന്തമാക്കിയത്. ത്രീ സീരീസിന്റെ ഉയർന്ന വകഭേദം എം സ്പോർട്സാണ് പുതിയ വാഹനം.
പുതിയ വാഹനത്തിന്റെ താക്കോൽ സ്വീകരിക്കാൻ റിമ കല്ലിങ്കലിന് ഒപ്പം ആഷിഖ് അബുവും എത്തിയിരുന്നു. ഇരുവരും ചേർന്ന് വാഹനത്തിന്റെ താക്കോൽ ഏറ്റുവാങ്ങി. ബി എം ഡബ്ല്യുവിന്റെ ഏറ്റവും മികച്ച കാറുകളിൽ ഒന്നാണ് 330 ഐ എം സ്പോർട്ട്. എം ബാഡ്ജിങ്ങുള്ള ഇന്റീരിയർ, എം ലെതർ സ്റ്റിയറിങ് വീൽ, എം സ്പെസിഫിക് ഡിസ്പ്ലെയുള്ള ഇൻസ്ട്രുമെന്റ് ക്ലസ്റ്റർ എന്നിവ 330ഐ എം സ്പോർട്ടിന്റെ പ്രത്യേകതകളാണ്.
വാഹനത്തിന് കരുത്ത് നൽകുന്നത് രണ്ടു ലിറ്റർ പെട്രോൾ എൻജിനാണ്. 258 ബിഎച്ച്പി കരുത്തും 400 എംഎം ടോർക്കും നൽകും ഈ എൻജിൻ. 5.8 സെക്കൻഡ് മാത്രമാണ് പൂജ്യത്തിൽ നിന്ന് 100 കിലോമീറ്റർ വേഗം കൈവരിക്കാൻ വേണ്ടിവരുന്നത്. മണിക്കൂറിൽ 250 കിലോമീറ്ററാണ് വാഹനത്തിന്റെ ഉയർന്ന വേഗം. വാഹനത്തിന്റെ എക്സ്ഷോറൂം വില ഏകദേശം 65 ലക്ഷം രൂപയാണ്.
