തിയറ്ററുകളിൽ മികച്ച അഭിപ്രായം നേടി മുന്നേറുകയാണ് ആർ ജെ മാത്തുക്കുട്ടി സംവിധാനം ചെയ്ത കുഞ്ഞെൽദോ എന്ന ചിത്രം. ചിത്രം റിലീസ് ചെയ്തതിനു പിന്നാലെ ഒറിജിനൽ കുഞ്ഞെൽദോയെ പരിചയപ്പെടുത്തിയിരിക്കുകയാണ് സംവിധായകൻ. സിനിമ പാരഡിസോ ക്ലബിലാണ് ആർ ജെ മാത്തുക്കുട്ടി യഥാർത്ഥ കുഞ്ഞെൽദോയെ പരിചയപ്പെടുത്തിയുള്ള പോസ്റ്റ് പങ്കുവെച്ചത്.
ആസിഫ് അലിക്കൊപ്പം യഥാർത്ഥ കുഞ്ഞെൽദോ നിൽക്കുന്ന ചിത്രം പങ്കുവെച്ചാണ് മാത്തുക്കുട്ടി കുറിപ്പ് പങ്കുവെച്ചത്. ‘ഓർമ്മ വെച്ച കാലം മുതലേയുള്ള എന്റെ കൂട്ടുകാരനാണ് ആസിഫ് അലിക്കൊപ്പം നിൽക്കുന്ന ഈ കുഞ്ഞെൽദോ. യുസി കോളേജിലെ ക്ലാസ്മുറിയിൽ ഒരുമിച്ചിരുന്നു പഠിച്ച കാലത്തെ അവന്റെ ജീവിതം പരമാവധി സത്യസന്ധമായി സ്ക്രീനിൽ എത്തിക്കാൻ ശ്രമിച്ചിട്ടുണ്ട്. ആ പ്രായത്തിൽ അവൻ എടുത്ത തീരുമാനങ്ങളോട് നമുക്ക് യോജിക്കാനും വിയോജിക്കാനും കഴിയും. അതെന്താണെങ്കിലും അഭിപ്രായങ്ങൾ അറിയിക്കുമെന്ന് പ്രതീക്ഷിക്കുന്നു. Do Watch Kunjeldho In Theatres’ – മാത്തുക്കുട്ടി പങ്കുവെച്ച കുറിപ്പ് ഇങ്ങനെ.
ഡിസംബർ 24നാണ് ചിത്രം തിയറ്ററുകളിൽ റിലീസ് ചെയ്തത്. ആർ ജെ മാത്തുക്കുട്ടി ആദ്യമായി സംവിധാനം ചെയ്ത ചിത്രമാണ് കുഞ്ഞെൽദോ. വിനീത് ശ്രീനിവാസൻ ആയിരുന്നു ചിത്രത്തിന്റെ ക്രിയേറ്റീവ് ഡയറക്ടർ. ലിറ്റിൽ ബിഗ് ഫിലിംസിന്റെ ബാനറിൽ സുവിൻ കെ വർക്കി, പ്രശോഭ് കൃഷ്ണ എന്നിവർ ചേർന്നാണ് ചിത്രം നിർമിച്ചത്. ഗോപിക ഉദയനാണ് നായികയായി എത്തുന്നത്. ചിത്രത്തിൽ 19കാരനായിട്ടാണ് ആസിഫ് അലി. കോളജ് പശ്ചാത്തലമാക്കിയാണ് ചിത്രം ഒരുങ്ങുന്നത്. ഷാൻ റഹ്മാൻ ആണ് ചിത്രത്തിലെ ഗാനങ്ങൾ ഒരുക്കുന്നത്. സ്വരൂപ് ഫിലിപ്പാണ് ഛായാഗ്രഹകൻ. വിനീത് ശ്രീനിവാസൻ ചിത്രത്തിലെ ക്രിയേറ്റീവ് ഡയറക്ടറായും അണിയറയിൽ എത്തുന്നുണ്ട്.
