അന്തരിച്ച സംവിധായകന്‍ സച്ചിയെക്കുറിച്ചുള്ള ചോദ്യം ഉള്‍പ്പെടുത്തി ഹയര്‍സെക്കണ്ടറി പരീക്ഷയിലെ ഇംഗ്ലീഷ് ചോദ്യ പേപ്പര്‍. പേര് കെ.ആര്‍. സച്ചിദാനന്ദന്‍, അറിയപ്പെടുന്നത് സച്ചി എന്ന്, തൃശൂരിലെ കൊടുങ്ങല്ലൂരില്‍ 1972 ഡിസംബര്‍ 25 ന് ജനനം, തിരക്കഥാകൃത്തും സംവിധായകനും നിര്‍മ്മാതാവും അഭിഭാഷകനുമായി ജോലിചെയ്തു, 2015 ല്‍ അനാര്‍ക്കലി എന്ന ചിത്രം ആദ്യമായി സംവിധാനം ചെയ്തു, 2020 ലെ അയ്യപ്പനും കോശിയും ഹിറ്റ് ചിത്രം, മരണം: 2020 ജൂണ്‍ 18ന്’. മേല്‍പ്പറഞ്ഞ വിവരങ്ങള്‍ ചേര്‍ത്ത് സച്ചിയുടെ ഒരു പ്രൊഫൈല്‍ എഴുതാനാണ് വിദ്യാര്‍ത്ഥികള്‍ക്കുള്ള ചോദ്യം.
13 വര്‍ഷങ്ങള്‍ നീണ്ട സിനിമാ ജീവിതത്തില്‍ 12 സിനിമകളാണ് സച്ചി ഒരുക്കിയത്. ഇടുപ്പ് മാറ്റിവെക്കല്‍ ശസ്ത്രക്രിയയ്ക്കു വിധേയനാക്കിയ ശേഷം അദ്ദേഹത്തിനു ഹൃദയാഘാതം സംഭവിക്കുകയായിരുന്നു. 2015ല്‍ പുറത്തിറങ്ങിയ അനാര്‍ക്കലിയിലൂടെയാണ് സച്ചി സംവിധായകനാകുന്നത്. ഈ സിനിമയിലെ നായകന്മാരായ പൃഥ്വിരാജ്-ബിജു മേനോന്‍ ജോഡികളെ കേന്ദ്ര കഥാപാത്രങ്ങളാക്കി സംവിധാനം ചെയ്ത ‘അയ്യപ്പനും കോശിയും’ ഹിറ്റായിരുന്നു. 50 കോടി ക്ലബ്ബും കടന്ന ചിത്രം ഹിന്ദിയിലേക്ക് റീമേക് ചെയ്യാനുള്ള ഒരുക്കത്തിനിടെയാണ് മുമ്പേയാണ് സച്ചിയുടെ വിയോഗം.
നിയമ ബിരുദധാരിയായ സച്ചി സുഹൃത്ത് സേതുവുമൊന്നിച്ച് സച്ചി-സേതു എന്ന പേരില്‍ ചോക്കളേറ്റ് ( 2007) , റോബിന്‍ഹുഡ് ( 2009 ) , സീനിയേഴ്‌സ് (2011) , മെയ്ക്കപ്പ് മേന്‍ ( 2011 ), ഡബിള്‍സ് ( 2011 ) എന്നീ സിനിമകള്‍ക്ക് ശേഷം സ്വതന്ത്ര രചയിതാവായി റണ്‍ ബേബി റണ്‍ ( 2012 ), ചേട്ടായീസ് (2012) , രാമലീല ( 2017 ), ഡ്രൈവിംഗ് ലൈസന്‍സ് ( 2019 ) എന്നി ചിത്രങ്ങള്‍ ചെയ്തു. 2017 ല്‍ ഷെര്‍ലക്ക് ടോംസ് എന്ന ചിത്രത്തില്‍ സഹ രചയിതാവായി .
