കഴിഞ്ഞദിവസമാണ് മലയാളത്തിലെ യുവനടി നടനും നിർമാതാവുമായ വിജയ് ബാബുവിന് എതിരെ പരാതി നൽകിയത്. വിമണ് എഗെയ്ന്സ്റ്റ് സെക്ഷ്വല് ഹരാസ്മെന്റ് എന്ന ഫേസ്ബുക്ക് പേജിലൂടെ യുവതി ആരോപണം വ്യക്തമാക്കുകയും ചെയ്തിരുന്നു. കഴിഞ്ഞ കുറച്ചു വര്ഷങ്ങളായി താൻ മലയാള സിനിമയില് നടിയായി ജോലി ചെയ്തു വരികയാണെന്നും 2022 മാര്ച്ച് 13 മുതല് ഏപ്രില് പതിനാല് വരെയുള്ള കാലയളവില് വിജയ് ബാബുവില് നിന്ന് ലൈംഗികമായി ചൂഷണം നേരിടേണ്ടിവന്നതായുമായാണ് യുവതി ഫേസ്ബുക്കില് കുറിച്ചത്.
വിജയ് ബാബുവിന് എതിരെ ഗുരുതര ആരോപണങ്ങൾ ഉയർന്ന പശ്ചാത്തലത്തിലാണ് ഒരു കാലത്ത് വിജയ് ബാബുവിന്റെ സഹപ്രവർത്തകയും സുഹൃത്തുമായിരുന്ന സാന്ദ്ര തോമസിനോട് കമന്റ് ബോക്സിൽ ഒരാൾ അഭിപ്രായം ചോദിച്ചത്. സാന്ദ്രയുടെ ഫേസ്ബുക്ക് പേജിൽ മക്കളുടെ യാത്രാ വീഡിയോ പങ്കുവെച്ച പോസ്റ്റിനു താഴെ വന്നാണ് ഒരാൾ, ‘വിജയ് ബാബുവിനെക്കുറിച്ച് രണ്ട് വാക്ക്’ എന്ന് ചോദിച്ചത്. ഇതിനു സാന്ദ്രാ തോമസ്, ‘ഒറ്റ വാക്കേ ഉള്ളൂ, സൈക്കോ’ എന്ന മറുപടിയാണ് നൽകിയത്. ഈ മറുപടി ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്.
വിജയ് ബാബുവിനെതിരെ ഗുരുതര ആരോപണങ്ങളാണ് കഴിഞ്ഞ കുറച്ചു ദിവസങ്ങളായി ഉയർന്നു കേൾക്കുന്നത്. യുവനടിക്ക് പരാതി ഉന്നയിച്ചതിനു പിന്നാലെ മറ്റൊരു യുവതിയും വിജയ് ബാബുവിനെതിരെ ആരോപണവുമായി രംഗത്ത് എത്തിയിരുന്നു. യുവനടി പരാതി നൽകി ദിവസങ്ങൾ കഴിഞ്ഞിട്ടും വിജയ് ബാബുവിനെ ഇതുവരെ അറസ്റ്റ് ചെയ്യാൻ പൊലീസിന് കഴിഞ്ഞിട്ടില്ല. ഒളിവിൽ കഴിയുന്ന വിജയ് ബാബു മുൻകൂർ ജാമ്യത്തിന് ശ്രമിക്കുന്നുണ്ടെന്നാണ് റിപ്പോർട്ടുകൾ. അതേസമയം, വിജയ് ബാബുവിന് എതിരായ പീഡനക്കേസിൽ താരസംഘടനയായ അമ്മ ഇന്ന് നടപടി സ്വീകരിക്കുമെന്നാണ് റിപ്പോർട്ട്. അമ്മയുടെ എക്സിക്യുട്ടിവ് കമ്മിറ്റി യോഗം ഞായറാഴ്ച ചേരും. വിജയ് ബാബുവിന് എതിരെ നടപടി ആവശ്യപ്പെട്ട് ആഭ്യന്തര പരാതിപരിഹാര സമിതി എക്സിക്യുട്ടീവ് കമ്മിറ്റിക്ക് ശുപാർശ നൽകിയിട്ടുണ്ട്.