ഇന്ത്യൻ സിനിമ കണ്ടിട്ടുള്ള മികച്ച ഛായാഗ്രാഹകരിൽ ഒരാളായ സന്തോഷ് ശിവനും മോഹൻലാലും ഒന്നിക്കുന്നതായി റിപ്പോർട്ടുകൾ. കലിയുഗം എന്നാണ് ചിത്രത്തിന് പേരിട്ടിരിക്കുന്നത് എന്നുമാണ് റിപ്പോർട്ടുകൾ. ഈ വർഷം പകുതിയോടെ ചിത്രീകരണം ആരംഭിക്കുമെന്നാണ് അറിയുന്നത്. ഉറുമിയാണ് സന്തോഷ് ശിവന്റെ സംവിധാനത്തിൽ അവസാനം മലയാളത്തിൽ ഇറങ്ങിയ ചിത്രം. മഞ്ജു വാര്യർ, കാളിദാസ് ജയറാം എന്നിവരെ കേന്ദ്ര കഥാപാത്രങ്ങളാക്കി ഒരുക്കുന്ന ത്രില്ലർ ചിത്രം ജാക്ക് ആൻഡ് ജിൽ അണിയറയിൽ ഒരുങ്ങുന്നുണ്ട്.
സന്തോഷ് ശിവൻ ഈ അടുത്ത് മോഹനലാലിനെ സന്ദർശിച്ചത് മുതലാണ് ഇരുവരും ഒന്നിക്കുന്ന ചിത്രം വരുന്നുവെന്ന റിപ്പോർട്ടുകൾ കേട്ട് തുടങ്ങിയത്. കാലാപാനി, വാനപ്രസ്ഥം, ഇരുവർ, യോദ്ധ തുടങ്ങിയ നിരവധി ചിത്രങ്ങളിലൂടെ മോഹൻലാൽ എന്ന നടനെ തന്റെ ക്യാമറക്കണ്ണുകളാൽ ഒപ്പിയെടുത്തിട്ടുള്ള സന്തോഷ് ശിവൻ മോഹൻലാലിനെ നായകനാക്കി സംവിധാനം നിർവഹിക്കുമ്പോൾ ആ ചിത്രവും വേറെ ലെവൽ ആയിരിക്കുമെന്ന് ഉറപ്പ്. രജനീകാന്ത് – മുരുഗദോസ് കൂട്ടുകെട്ടിൽ ഒരുങ്ങുന്ന ചിത്രത്തിന്റെ ക്യാമറ കൈകാര്യം ചെയ്യുന്നതും സന്തോഷ് ശിവനാണ്.
