മഹിന്ദ്രയുടെ XUV 700 ലോഞ്ച് ചെയ്ത് ഗായിക സയനോര ഫിലിപ്പ്. കണ്ണൂരിലെ വീർ മഹിന്ദ്ര കേരളയിലെ ചടങ്ങിലാണ് താരം ലോഞ്ചിംഗ് നടത്തിയത്. ലോഞ്ച് ചടങ്ങിൽ പങ്കെടുത്ത സയനോര ആ നിമിഷങ്ങളും ആരാധകർക്കായി പങ്കുവെച്ചു. അതേസമയം, ചടങ്ങിലെ ചിത്രങ്ങൾ പങ്കുവെച്ചതിന് അടിയിൽ കമന്റുമായി ആരാധകരും എത്തി. ലോഞ്ചിംഗിന് ക്ഷണിക്കപ്പെട്ടവർക്ക് വണ്ടി ഫ്രീ ആയി കിട്ടിയോ എന്നായിരുന്നു ഒരാൾക്ക് അറിയേണ്ടിയിരുന്നത്. ഇനി ഇതിന്റെ പേരിൽ ഒരു ഡാൻസ് ഉണ്ടാകുമോ എന്നായിരുന്നു മറ്റൊരാളുടെ സംശയം.
പുതിയ ഫ്ലാഗ്ഷിപ്പ് എസ്‍യുവി മോഡലായ XUV 700ന്‍റെ എല്ലാ വേരിയന്റുകളും മഹിന്ദ്ര വിപണിയില്‍ അവതരിപ്പിച്ചു. പെട്രോള്‍, ഡീസല്‍ എന്‍ജിനുകളില്‍ ആണ് വാഹനം എത്തുന്നത്. ഈ വാഹനത്തിന്റെ പെട്രോള്‍ പതിപ്പിന് 11.99 ലക്ഷം രൂപ മുതല്‍ 20.99 ലക്ഷം രൂപ വരെയാണ് വില. അതേസമയം, ഡീസല്‍ മോഡലിന് 14.59 ലക്ഷം രൂപ മുതല്‍ 21.09 ലക്ഷം രൂപ വരെയാണ് എക്‌സ്‌ഷോറും വില എന്നാണ് റിപ്പോർട്ടുകൾ. വാഹനത്തിന്റെ ബുക്കിംഗ് ഒക്ടോബര്‍ ഏഴ് മുതലും വാഹനത്തിന്റെ ഡെലിവറി ഒക്ടോബർ 10 മുതലുംആരംഭിക്കുമെന്നാണ് റിപ്പോര്‍ട്ട്.
മലയാളികളുടെ പ്രിയപ്പെട്ട ഗായികയായ സയനോര ഫിലിപ്പ് സോഷ്യൽ മീഡിയയിലും സജീവമാണ്. തന്റെ ജീവിതത്തിലെ പ്രധാനപ്പെട്ട നിമിഷങ്ങളും സുഹൃത്തുക്കൾക്ക് ഒപ്പമുള്ള നിമിഷങ്ങളും സയനോര സോഷ്യൽ മീഡിയയിൽ പങ്കുവെക്കാറുണ്ട്. കഴിഞ്ഞയിടെ സുഹൃത്തുക്കളായ ഭാവന, രമ്യ നമ്പീശൻ, ശിൽപ ബാല, മൃദുല മുരളി എന്നിവരുമായി ഒത്തു കൂടിയ നിമിഷവും സയനോര സോഷ്യൽ മീഡിയയിൽ പങ്കുവെച്ചിരുന്നു. എല്ലാവരും ചേർന്ന് ഥാൽ സിനിമയിലെ പാട്ടിന് നൃത്തം വെച്ചതും സോഷ്യൽ മീഡിയയിൽ പങ്കുവെച്ചിരുന്നു. നൃത്ത വീഡിയോ സോഷ്യൽ മീഡിയയിൽ വൈറലാകുകയും ചെയ്തിരുന്നു.
