സിനിമ രംഗത്തേക്ക് കടന്നുവന്നിട്ട് ഇരുപത്തൊമ്പത് വർഷങ്ങൾ പിന്നിട്ടിട്ടും ഇന്നും സിനിമ രംഗത്ത് ഒരു രാജകീയ സ്ഥാനം അലങ്കരിക്കുന്ന വ്യക്തിയാണ് ഷാരൂഖ് ഖാൻ. സിദ്ധാർഥ് ആനന്ദ് ഒരുക്കുന്ന പത്താൻ എന്ന ചിത്രത്തിന്റെ ഷൂട്ടിങ്ങിന്റെ അവസാനഘട്ടത്തിലാണ് അദ്ദേഹമിപ്പോൾ. അത് പൂർത്തിയാകുന്നതിന് അനുസരിച്ച് തമിഴിലെ ബ്ലോക്ക്ബസ്റ്റർ സംവിധായകൻ ആറ്റ്ലീ ഒരുക്കുന്ന പുതിയ ചിത്രത്തിൽ ഷാരൂഖ് ജോയിൻ ചെയ്യുമെന്നാണ് അറിയുവാൻ കഴിയുന്നത്.
ജവാൻ എന്ന പേരാണ് ചിത്രത്തിന് സ്വീകരിച്ചിരിക്കുന്നത് എന്നാണ് റിപ്പോർട്ടുകൾ പുറത്തുവരുന്നത്. ഷാരൂഖ് ഖാൻ ഡബിൾ റോളിലായിരിക്കും ചിത്രത്തിൽ എത്തുന്നത്. നയൻതാര നായികയാകുന്ന ചിത്രത്തിന്റെ ഷൂട്ട് അടുത്ത ദിവസങ്ങളിൽ പൂനെയിൽ ആരംഭിക്കും. സംവിധായകനും മറ്റ് അണിയറപ്രവർത്തകരും പൂനെയിൽ ചിത്രീകരണം തുടങ്ങുവാനുള്ള ഒരുക്കങ്ങൾ നടത്തുകയാണ്. ഷാരൂഖ് ഖാന്റെ ഉടമസ്ഥതയിലുള്ള റെഡ് ചില്ലീസ് നിർമ്മിക്കുന്ന ചിത്രത്തിൽ സന്യ മൽഹോത്ര, സുനിൽ ഗ്രോവർ തുടങ്ങിയവരും അഭിനയിക്കുന്നുണ്ട്.
ഡ്യൂപ്ലിക്കേറ്റ്, പഹേലി, ഡോൺ, ഫാൻ തുടങ്ങിയ ചിത്രങ്ങളിൽ ഷാരൂഖ് ഖാൻ ഡബിൾ റോളിൽ അഭിനയിച്ചിട്ടുണ്ട്. പാൻ ഇന്ത്യൻ ലെവലിൽ ഒരുക്കുന്ന ജവാനിൽ സൗത്ത് ഇന്ത്യയിൽ നിന്നുമുള്ള താരങ്ങളും ഭാഗമാകുന്നുണ്ട്. പൂനെയിലെ ചിത്രീകരണത്തിന് ശേഷം ബാക്കി ഭാഗങ്ങൾ വിദേശത്താണ് ചിത്രീകരിക്കുക. രാജാ റാണി, മെർസൽ, ബിഗിൽ എന്നീ സൂപ്പർഹിറ്റ് ചിത്രങ്ങൾ ഒരുക്കിയിട്ടുള്ള സംവിധായകനാണ് ആറ്റ്ലീ.
