അമൃത ടിവിയിലെ സൂപ്പർ ഡാൻസർ എന്ന പ്രോഗ്രാമിലൂടെയാണ് ഷംന കാസിം എന്ന പൂർണ പ്രശസ്തി നേടുന്നത്. മഞ്ഞു പോലൊരു പെൺകുട്ടി എന്ന ചിത്രത്തിൽ അഭിനേതാവായി തുടക്കം കുറിച്ചു. തുടർന്ന് 2004ൽ എന്നിട്ടും എന്ന മലയാള ചിത്രത്തിൽ നായികയായി അരങ്ങേറ്റം കുറിച്ച നടി പിന്നീട് തമിഴ്, തെലുങ്ക്, കന്നഡ ചിത്രങ്ങളിലും ശ്രദ്ധേയമായ കഥാപാത്രങ്ങളുമായി മുന്നോട്ട് പോവുകയാണ്. അന്യഭാഷകളിൽ നല്ല റോളുകൾ ലഭിച്ചിട്ടും മലയാളത്തിൽ അത്തരം റോളുകൾ ലഭിക്കാത്തത് എന്തുകൊണ്ടാണെന്ന് ചോദിക്കുകയാണ് താരം.
അന്യഭാഷകളിലെ പോലെ നല്ല കഥാപാത്രങ്ങൾ മലയാളത്തിൽ എനിക്ക് എന്തുകൊണ്ട് ലഭിക്കുന്നില്ല എന്നോർത്ത് ഞാൻ അത്ഭുതപ്പെടാറുണ്ട്. മലയാളത്തിലെ ചില സിനിമകൾ കാണുമ്പോൾ ഞാൻ ഇതിനെ കുറിച്ച് ആലോചിക്കും. അത് എപ്പോഴും ഒരു ചോദ്യചിഹ്നം പോലെ എന്റെ മുൻപിലുണ്ട്. ജോസഫ് സിനിമയുടെ തമിഴ് റീമേക്കിൽ എനിക്ക് ലഭിച്ചിരിക്കുന്നത് വളരെ അഭിനയ പ്രാധാന്യം ഉള്ളൊരു വേഷമാണ്. തമിഴിൽ എനിക്കിത് ചെയ്യാമെങ്കിൽ മലയാളത്തിൽ എന്തുകൊണ്ട് ചെയ്‌തു കൂടാ? അതിനുള്ള ഉത്തരം എനിക്ക് ഇത് വരെ ലഭിച്ചിട്ടില്ല. ഞാൻ ഒരുപാട് സ്റ്റേജ് ഷോകൾ ചെയ്യുന്നത് കൊണ്ടും എന്നെ കാണാൻ മലയാളിയെ പോലെയല്ലാത്തത് കൊണ്ടുമാണെന്നാണ് ചിലർ പറയുന്നത്.
