ഇരുപത്തിയഞ്ചാമത് കേരള അന്താരാഷ്ട്ര ചലച്ചിത്രമേളയില്‍ ഇടംനേടി ഷൈൻ ടോം ചാക്കോ ചിത്രം ലവ്, ചിത്രത്തിൽ ഷൈൻ ടോം ചാക്കോയ്‌ക്കൊപ്പം നായികയായി എത്തുന്നത് രജീഷ വിജയൻ ആണ്, ത്രില്ലര്‍ വിഭാഗത്തില്‍ ഒരുക്കിയ ചിത്രത്തില്‍ ദീപ്തി- അനൂപ് എന്നീ ദമ്പതികളുടെ വേഷത്തിലാണ് രജീഷയും ഷൈനും എത്തുന്നത്. വിവാഹശേഷം ഇവരുടെ കുടുംബത്തിൽ ഉണ്ടാകുന്ന പ്രശ്നങ്ങൾ ആണ് സിനിമയുടെ പ്രമേയം. മലയാളം സിനിമ ടുഡേ എന്ന കാറ്റഗറിയിലാണ് ഖാലിദ് റഹ്മാന്‍ സംവിധാനം ചെയ്ത ലവ് പ്രദര്‍ശിപ്പിക്കുന്നത്.
ജി.സി.സിയിലും യുഎ യിലും സിനിമ നേരത്തെ റിലീസ് ചെയ്തിരുന്നു, ലോക്ക് ഡൗണിൽ തിയേറ്ററുകൾ അടച്ചിട്ട് തുറന്നതിന് ശേഷം ജി.സി.സിയിലും യുഎ.യിലും റിലീസ് ചെയ്ത ആദ്യ മലയാള ചിത്രം കൂടിയാണ് ലവ്. സിനിമയുടെ ട്രെയ്‌ലറിന്ന് മികച്ച പ്രതികരണമാണ് ലഭിച്ചത്. ചിത്രം റിലീസ് ചെയ്യുന്നത് ഓൺലൈൻ ആയിട്ടാണെന്നാണ് ലഭിക്കുന്ന വിവരം. ലോക്ക് ഡൗണിൽ ചിത്രീകരണം പൂർത്തിയായ ആദ്യ മലയാള സിനിമ കൂടിയാണ് ലവ്. 24 ദിവസം കൊണ്ടാണ് ചിത്രം നിർമ്മിച്ചത്.
ജിംഷി ഖാലിദാണ് ഛായാഗ്രാഹണം. യാക്സന്‍ ഗാരി പെരേരയും നേഹ എസ് നായരുമാണ് സംഗീത സംവിധാനം. അനുരാഗ കരിക്കിൻ വെള്ളത്തിനും ഉണ്ടയ്ക്കും ശേഷം ഖാലിദ് റഹ്മാൻ സംവിധാനം ചെയ്യുന്ന ചിത്രത്തിന്റെ നിർമ്മാണം ആഷിഖ് ഉസ്മാനാണ്. ഗോകുലൻ ,വീണ നന്ദകുമാർ ,ജോണി ആന്റണി ,സുധി കോപ്പ എന്നിവരും ചിത്രത്തിൽ പ്രധാന വേഷത്തിൽ എത്തുന്നു.
