മലയാളി സിനിമാപ്രേമികളുടെ മനസിൽ വളരെയേറെ ഇഷ്ടം സ്വന്തമാക്കിയിട്ടുള്ള നായികാ – നായകൻമാരാണ് മമ്മൂട്ടിയും ശോഭനയും. ‘മഴയെത്തും മുമ്പേ’, ‘കളിയൂഞ്ഞാൽ’, ഹിറ്റ്ലർ എന്നിങ്ങനെ എത്രയെത്ര ചിത്രങ്ങൾ. ഇപ്പോഴിതാ നീണ്ട ഇടവേളയ്ക്കു ശേഷം ഇരുവരും ഒറ്റ ഫ്രെയിമിൽ ഒരുമിച്ച് എത്തിയിരിക്കുകയാണ്. ‘ഫാൻ മൊമന്റ്’ എന്ന അടിക്കുറിപ്പോടെ ശോഭനയാണ് മമ്മൂട്ടിക്ക് ഒപ്പമുള്ള ചിത്രം പങ്കുവെച്ചത്. കൊച്ചിയിൽ വെച്ചായിരുന്നു കൂടിക്കാഴ്ച.
സോഷ്യൽ മീഡിയയിൽ ശോഭന പങ്കുവെച്ച സെൽഫി നിമിഷങ്ങൾക്കുള്ളിൽ വൈറലായി. ‘ക്യാപ്റ്റനെ കണ്ടു, ഫാൻ മൊമന്റ്’ എന്ന അടിക്കുറിപ്പോടെ ആയിരുന്നു ശോഭന ചിത്രം പങ്കുവെച്ചത്. കൊച്ചിയിൽ ഇപ്പോൾ മമ്മൂട്ടി നായകനാകുന്ന സി ബി ഐ സീരീസിലെ അഞ്ചാം ചിത്രത്തിന്റെ ഷൂട്ടിംഗ് പുരോഗമിക്കുകയാണ്. ചിത്രത്തിന്റെ ലൊക്കേഷനിൽ എത്തിയാണ് ശോഭന മമ്മൂട്ടിയെ കണ്ടത്.
ഏതായാലും വെള്ളിത്തിരയിലെ തങ്ങളുടെ പ്രിയപ്പെട്ട നായകരെ ആരാധകർ വളരെ പെട്ടെന്നു തന്നെ ഏറ്റെടുത്തു. ഫോട്ടോ പങ്കുവെച്ച് മണിക്കൂറുകൾക്കുള്ളിൽ തൊണ്ണൂറായിരത്തിന് അടുത്ത് ലൈക്കുകളാണ് ചിത്രത്തിന് ലഭിച്ചത്. നിരവധി പേരാണ് ചിത്രത്തിന് കമന്റുകളുമായി എത്തിയിരിക്കുന്നത്.
കൊച്ചിയിൽ സിബിഐ 5ന്റെ ചിത്രീകരണം തുടരുകയാണ്. അതേസമയം, ചിത്രത്തിലെ മമ്മൂട്ടിയുടെ ഗെറ്റപ്പ് വെളിപ്പെടുത്തുന്ന ചിത്രങ്ങളൊന്നും ഇതുവരെ പുറത്തു വന്നിട്ടില്ല. എസ് എന്‍ സ്വാമി, കെ മധു, മമ്മൂട്ടി ടീം ഒന്നിക്കുന്ന ചിത്രം വളരെ ആകാംക്ഷയോടെയാണ് ആരാധകർ കാത്തിരിക്കുന്നത്. ചിത്രത്തിൽ ജഗതി ശ്രീകുമാറും ഉണ്ടാകും എന്നതാണ് ചിത്രത്തെക്കുറിച്ച് ഏറ്റവും അവസാനം പുറത്തുവരുന്ന വാർത്തകൾ. അനൂപ് സത്യൻ സംവിധാനം ചെയ്ത വരനെ ആവശ്യമുണ്ട് എന്ന ചിത്രത്തിലൂടെ ആയിരുന്നു നീണ്ട ഇടവേളയ്ക്ക് ശേഷം ശോഭന മലയാളസിനിമയിലേക്ക് എത്തിയത്.
View this post on Instagram
