അനൂപ് മേനോന്‍, ബൈജു സന്തോഷ്, കലാഭവന്‍ ഷാജോണ്‍, രമേഷ് പിഷാരടി എന്നിവര്‍ മുഖ്യ കഥാപാത്രങ്ങളാക്കുന്ന തിമിംഗലവേട്ട എന്ന ചിത്രത്തിന്റെ ഷൂട്ടിംഗ് ഡിസംബര്‍ 21ന് ആരംഭിക്കുന്നു. തിരുവനന്തപുരം വിഴിഞ്ഞത്താണ് ചിത്രീകരണം ആരംഭിക്കുക. രാകേഷ് ഗോപന്‍ ആണ് ചിത്രത്തിന്റെ രചനയും സംവിധാനവും നിര്‍വഹിക്കുന്നത്.
വിഎംആര്‍ ഫിലിംസിന്റെ ബാനറില്‍ സജിമോന്‍ നിര്‍മ്മിക്കുന്ന രണ്ടാമത്തെ ചിത്രമാണ്. തിരുവനന്തപുരം, ജയ്പൂര്‍, മുംബൈ എന്നിവിടങ്ങളില്‍ ചിത്രീകരിക്കുന്ന ചിത്രത്തിന്റെ ഛായഗ്രഹണം നിര്‍വിക്കുന്നത് പ്രദീപ് നായര്‍ ആണ്. ജഗദീഷ്, വിജയരാഘവന്‍, മണിയന്‍ പിള്ള രാജു, കോട്ടയം രമേശ്, നന്ദു, കുഞ്ഞികൃഷ്ണന്‍ മാഷ് (എന്നാ താന്‍ കേസ് കൊട് ഫെയിം) എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. രാധിക രാധാകൃഷ്ണന്‍ (അപ്പന്‍ ഫെയിം) ആണ് നായിക കഥാപാത്രത്തെ അവതരിപ്പിക്കുന്നത്.
ബിജിബാലിന്റെ സംഗീതത്തിന് ബി.കെ.ഹരിനാരായണനാണ് രചന നിര്‍വഹിക്കുന്നത്. പ്രൊഡക്ഷന്‍ കണ്‍ട്രോളര്‍ എസ്. മുരുഗന്‍, ആര്‍ട് ഡയറക്ടര്‍ കണ്ണന്‍ അതിരപ്പിള്ളി, മേക്കപ്പ് – റോണെക്‌സ് സേവിയര്‍, വസ്ത്രലങ്കാരം – അരുണ്‍ മനോഹര്‍, എഡിറ്റിംഗ് – നൗഫല്‍ അബ്ദുല്ല, അസോസിയേറ്റ് ഡയറക്ടര്‍ – ഹരിസുതന്‍, പിആര്‍ഒ- വാഴൂര്‍ ജോസ് എന്നിവരാണ് മറ്റ് അണിയറപ്രവര്‍ത്തകര്‍.
