നടനും നിര്‍മാതാവുമായ വിജയ് ബാബുവിനെതിരെ നടപടിയെടുക്കാത്തതില്‍ പ്രതിഷേധവുമായി നടി മാല പാര്‍വതി അമ്മ സംഘടനയിലെ പരാതി പരിഹാര സമിതിയില്‍ നിന്ന് കഴിഞ്ഞ ദിവസം രാജി വെച്ചിരുന്നു. കമ്മിറ്റി അംഗമെന്നത് വലിയ ഉത്തരവാദിത്തമാണ്. എന്നാല്‍ തന്റെ മനസാക്ഷിക്ക് അനുസൃതമായി ഉത്തരവാദിത്തങ്ങള്‍ നിറവേറ്റാന്‍ കഴിയുമോ എന്ന കാര്യത്തില്‍ സംശയമുണ്ട്. അതിനാലാണ് രാജി സമര്‍പ്പിക്കുന്നതെന്നും മാല പാര്‍വതി പറഞ്ഞു.
ഇപ്പോഴിതാ വിജയ് ബാബുവിനെതിരെ നടപടി എടുക്കാത്തതിൽ പ്രതിഷേധിച്ച് ശ്വേതാ മേനോനും കുക്കു പരമേശ്വരനും അമ്മയുടെ ആഭ്യന്തര പരാതിപരിഹാര സെല്ലിൽ നിന്ന് രാജി വെച്ചിരിക്കുകയാണ്. കഴിഞ്ഞ ദിവസം മാലാ പാർവതി നടത്തിയ വാർത്താസമ്മേളനത്തിൽ ഐ.സി.സി ചെയർമാനായ ശ്വേതാ മേനോനും സമിതിയിലെ മറ്റൊരംഗമായ കുക്കു പരമേശ്വരനും രാജിവെയ്ക്കാനുള്ള സന്നദ്ധത പ്രകടിപ്പിച്ചിരുന്നെന്ന് വെളിപ്പെടുത്തിയിരുന്നു.
കൊച്ചിയിൽ ചേർന്ന അമ്മയുടെ നിർവാഹക സമിതി യോഗത്തിൽ വിജയ് ബാബുവിനെതിരെ നടപടിയുണ്ടാകുമെന്ന് അറിയിച്ചിരുന്നെങ്കിലും സ്വയം മാറിനിൽക്കാമെന്ന അദ്ദേഹത്തിന്റെ ദ്ദേഹത്തിന്റെ കത്ത് യോഗം അംഗീകരിക്കുകയായിരുന്നു. ഇതിലുള്ള പ്രതിഷേധമായിട്ടാണ് കൂട്ടരാജി. നടി രചന നാരായണൻക്കുട്ടിയും അഭിഭാഷക അനഘ രാമനും മാത്രമാണ് ഇനി പരാതി പരിഹാര സമതിയിലുള്ളത്.
