ഓരോ പോസ്റ്ററും കൊണ്ട് കൗതുകവും ആകാംക്ഷയും നിറച്ച് അക്ഷരാർത്ഥത്തിൽ തരംഗമായിരിക്കുകയാണ് ജനപ്രിയനായകൻ ദിലീപ് നായകനായ കമ്മാരസംഭവം. നവാഗതനായ രതീഷ് അമ്പാട്ട് ഒരുക്കുന്ന ഈ ചിത്രത്തിലൂടെ തെന്നിന്ത്യൻ സൂപ്പർ താരം സിദ്ധാർഥും മലയാളത്തിലേക്ക് അരങ്ങേറ്റം കുറിക്കുകയാണ്. ക്വാളിറ്റിയുടെ കാര്യത്തിലായാലും പ്രേക്ഷകരെ ആസ്വദിപ്പിക്കുന്നതിലെ മികവിലായാലും സാങ്കേതികതികവിലായാലും ഒരു വിട്ടു വീഴ്ചയില്ലാത്ത ചിത്രമായിരിക്കും കമ്മാരസംഭവമെന്ന് സിദ്ധാർത്ഥ് വെളിപ്പെടുത്തി. ദിലീപേട്ടനൊപ്പം അഭിനയിക്കാൻ കഴിഞ്ഞത് വലിയൊരു ഭാഗ്യമാണെന്നും ഈ ചിത്രത്തിന് വേണ്ടി അദ്ദേഹം സഹിച്ച കഷ്ടപ്പാടുകൾ താൻ നേരിട്ട് കണ്ടതാണെന്നും സിദ്ധാർത്ഥ് പറഞ്ഞു. “ഒരു നടനെന്ന നിലയിൽ അദ്ദേഹത്തിന്റെ ഏറ്റവും മികച്ച പ്രകടനമായിരിക്കും കമ്മാരസംഭവത്തിലേത്. ഇനി മുതൽ ഈ ചിത്രത്തിന്റെ പേരിലായിരിക്കും ദിലീപേട്ടൻ അറിയപ്പെടാൻ പോകുന്നത്. കാരണം അത്രക്ക് അത്ഭുതപ്പെടുത്തുന്ന പ്രകടനമാണ് അദ്ദേഹം കാഴ്ച വെച്ചിരിക്കുന്നത്.” സിദ്ധാർത്ഥ് കൂട്ടിച്ചേർത്തു.
മൂന്ന് വർഷം മുന്നേ തുടങ്ങിയ ചിത്രത്തിന് പിന്നിൽ പ്രവൃത്തിച്ച മുഴുവൻ അണിയറപ്രവർത്തകരെയും അദ്ദേഹം അനുമോദിച്ചു. ” ഞാൻ മാത്രമല്ല, ഈ ചിത്രത്തിന് പിന്നിൽ പ്രവൃത്തിച്ച എല്ലാവരും വളരെയധികം നാളുകളായി ഒരുമിച്ചാണ്. അങ്ങനെ സംഭവിക്കുന്നത് തന്നെ വിരളമാണ്. എല്ലാവരും ഒരേ മനസ്സോടും ഒരേ ആവേശത്തോടും കൂടി തന്നെയാണ് അവർ സ്വപ്നം കണ്ട ഈ ചിത്രത്തിനായി അധ്വാനിച്ചത്. വളരെ കുറച്ച് സിനിമകൾക്കേ ഇത്രയധികം പേരെ ഒരൊറ്റ ടീമായിട്ട് ഇത്രയും നാൾ ഒരുമിച്ച് നിർത്താൻ സാധിച്ചിട്ടുള്ളൂ. അത് തന്നെയാണ് ഈ ചിത്രത്തിന്റെ ഏറ്റവും വലിയ ക്വാളിറ്റിയും. ഈ വർഷം ഇറങ്ങുന്ന ഏത് ഇന്റർനാഷണൽ ചിത്രമായിട്ടും കമ്മാരസംഭവത്തെ താരതമ്യം ചെയ്യാൻ സാധിക്കുമെന്ന് ഞാൻ ഉറപ്പ് തരുന്നു.”
