ബിഗ് ബോസ് സീസണ്‍ ഫോറില്‍ നിലപാടുകള്‍ കൊണ്ട് ശ്രദ്ധേയമായ മത്സരാര്‍ത്ഥിയായിരുന്നു റിയാസ് സലിം. ജെന്‍ഡര്‍ ഈക്വാലിറ്റി, ട്രാന്‍സ്‌ജെന്‍ഡര്‍ വിഷയങ്ങളില്‍ അടക്കം റിയാസ് സ്വീകരിച്ച നിലപാട് ശ്രദ്ധിക്കപ്പെട്ടിരുന്നു. ഇപ്പോഴിതാ ഏഷ്യാനെറ്റിലെ കോമഡി സ്റ്റാര്‍സ് പരിപാടിയില്‍ റിയാസ് അതിഥിയായി എത്തിയപ്പോള്‍ അവതാരക മീര ചോദിച്ച ചോദ്യങ്ങളാണ് വിമര്‍ശനങ്ങള്‍ക്ക് കാരണമായിരിക്കുന്നത്. റിയാസിന്റെ ജെന്‍ഡര്‍ ഐഡന്റിറ്റിയെ ചോദ്യം ചെയ്യുന്ന രീതിയില്‍ തികച്ചും വ്യക്തിപരമായ കാര്യങ്ങളാണ് മീര ചോദിച്ചത്. ഇതിന് കൃത്യമായ മറുപടിയും റിയാസ് നല്‍കുന്നുണ്ട്.
റിയാസ് തന്റെ ഓറിയന്റേഷന്‍ സ്‌പെഷ്യലാണെന്ന് പറഞ്ഞു എന്നാണ് മീര ചൂണ്ടിക്കാട്ടുന്നത്. ഇതിന് മറുപടിയായി തന്റെ ഓറിയന്റേഷന്‍ സ്‌പെഷ്യലാണെന്ന് താന്‍ പറഞ്ഞിട്ടില്ലെന്നും താനാണ് സ്‌പെഷ്യല്‍ എന്നാണ് പറഞ്ഞതെന്നുമായിരുന്നു റിയാസ് പറഞ്ഞത്. താന്‍ പറയാത്ത കാര്യങ്ങള്‍ മീര പറഞ്ഞതായും റിയാസ് പറഞ്ഞു. അവതാരക പറഞ്ഞ മറ്റൊരു കാര്യം റിയാസ് പങ്കുവയ്ക്കുന്ന ഫോട്ടോകള്‍ക്ക് താഴെ ഇത് ആണാണോ പെണ്ണാണോ എന്നാണ് പലരും ചോദിക്കുന്നതെന്നായിരുന്നു. ഇപ്പോഴും അത്തരത്തിലുള്ള കമന്റുകള്‍ വരുന്നുണ്ടെങ്കില്‍ അത് തന്റെ പ്രശ്‌നമല്ലെന്നും അത് അവരുടെ പ്രശ്‌നമാണെന്നും റിയാസ് പറഞ്ഞു.
റിയാസിനെ ബുള്ളി ചെയ്തവരില്‍ കൂടുതലും ആണുങ്ങളാണോ പെണ്ണുങ്ങളാണോ എന്നായിരുന്നു മറ്റൊരു ചോദ്യം. രണ്ടു കൂട്ടരുമുണ്ടാകാമെന്നും എന്നാല്‍ പുരുഷന്മാരായിരിക്കും ഏറ്റവും കൂടുതല്‍ ഇങ്ങനെയുള്ള കാര്യങ്ങള്‍ ചെയ്യുകയെന്നും റിയാസ് മറുപടി നല്‍കി. ഫിസിക്കലി അട്രാക്ടീവായിട്ടുള്ള ഒരു പയ്യനാണ് റിയാസ് എന്നും അതിന്റെ പേരില്‍ പെണ്‍കുട്ടികള്‍ അപ്രോച്ച് ചെയ്യാറുണ്ടോ എന്നുമായിരുന്നു മറ്റൊരു ചോദ്യം. റിയാസ് അതിനെ എങ്ങനെ കൈകാര്യം ചെയ്യുമെന്നും മീര ചോദിച്ചു. ദാറ്റ്സ് മൈ പേഴ്‌സണല്‍ ലൈഫ് എന്നായിരുന്നു റിയാസ് പറഞ്ഞത്. ഞാനത് പേഴ്സണലി ഹാന്‍ഡില്‍ ചെയ്യും. അത് ഈയൊരു ഷോയില്‍ വന്ന് പറയേണ്ട ആവശ്യമുണ്ടെന്ന് തനിക്ക് തോന്നുന്നില്ലെന്നും റിയാസ് കൂട്ടിച്ചേര്‍ത്തു.
