മലയാളത്തിലെ എക്കാലത്തേയും ഹിറ്റ് ചിത്രങ്ങളില്‍ ഒന്നാണ് ഭദ്രന്‍ സംവിധാനം ചെയ്ത സ്ഫടികം. 1995 ലാണ് ചിത്രം പുറത്തിറങ്ങിയത്. മോഹന്‍ലാല്‍ ആടുതോമയായും തിലകന്‍ ചാക്കോ മാഷായും മത്സരിച്ചഭിനയിച്ച ചിത്രം ഇന്നും പ്രേക്ഷകര്‍ക്കൊരു അത്ഭുതക്കാഴ്ചയാണ്.
ഇപ്പോഴിതാ സിനിമയിലെ ഓര്‍മകള്‍ പങ്കുവയ്ക്കുകയാണ് ചിത്രത്തിലെ പൊലീസ് കഥാപാത്രത്തെ അവതരിപ്പിച്ച സ്ഫടികം ജോര്‍ജ്. ബിഹൈന്‍വുഡ്‌സിന് വേണ്ടി മണിയന്‍ പിള്ള രാജുവുമായി നടത്തിയ അഭിമുഖത്തിലാണ് ജോര്‍ജ് ഓര്‍മകള്‍ പങ്കുവച്ചത്. സ്ഫടികത്തിന്റെ ഓഡീഷന് പോയപ്പോള്‍ ഭദ്രന്‍ ആരാണെന്ന് പോലും തനിക്ക് അറിയില്ലായിരുന്നുവെന്ന് സ്ഫടികം ജോര്‍ജ് പറയുന്നു. അന്ന് അദ്ദേഹം കഥ പറഞ്ഞപ്പോള്‍ ഇനി തനിക്ക് ഇതുപോലൊരു കഥാപാത്രത്തെ ലഭിക്കില്ലെന്ന് പറഞ്ഞിരുന്നുവെന്നും സ്ഫടികം ജോര്‍ജ് ഓര്‍ത്തെടുത്തു.
സ്ഫടികം ചെയ്യുന്ന സമയത്ത് ഒന്നര വര്‍ഷത്തോളം മറ്റ് സിനിമകളില്‍ അഭിനയിച്ചിരുന്നില്ല. ചിത്രത്തിന്റെ തെലുങ്കിലും താന്‍ അഭിനയിച്ചിരുന്നു. അവിടെ ക്വാറിയൊക്കെ എസി ഒക്കെ ഫിറ്റ് ചെയ്ത് സെറ്റിട്ടിരിക്കുകയായിരുന്നു. മോഹന്‍ലാലിലെപ്പോലെ യഥാര്‍ഥ ക്വാറിയില്‍പോയി വെയിലൊക്കെ ഏറ്റ് കഥാപാത്രത്തിന് വേണ്ടി കഠിനാധ്വാനം ചെയ്യാനൊന്നും നാഗാര്‍ജുനയ്‌ക്കൊ തെലുങ്കിലെ മറ്റ് സിനിമാ പ്രവര്‍ത്തകര്‍ക്കോ താത്പര്യമില്ല. അതുകൊണ്ട് തന്നെ ആ സിനിമ അവിടെ പരാജയമായിരുന്നുവെന്നും അദ്ദേഗം കൂട്ടിച്ചേര്‍ത്തു.
