ബാഹുബലിക്ക് ശേഷം മാസ്റ്റർ ഡയറക്ടർ എസ് എസ് രാജമൗലി സംവിധാനം ചെയ്ത ചിത്രം ആർ ആർ ആർ തിയറ്ററുകളിൽ മികച്ച പ്രതികരണം നേടി പ്രദർശനം തുടരുകയാണ്. ആരാധകർ ആവേശത്തോടെ കാത്തിരുന്ന ചിത്രം മാർച്ച് 25നാണ് തിയറ്ററുകളിൽ എത്തിയത്. ഇന്ത്യൻ സിനിമയിലെ തന്നെ ഏറ്റവും വലിയ ചിത്രമായി ബ്രഹ്മാണ്ഡ റിലീസ് ആയാണ് ചിത്രമെത്തിയത്. അഞ്ച് ഇന്ത്യൻ ഭാഷകളിൽ ഉൾപ്പെടെ എട്ടോളം ഭാഷകളിൽ എത്തിയ ചിത്രം ലോകമാകമാനം 10000 ത്തിൽ അധികം സ്ക്രീനുകളിലാണ് റിലീസ് ചെയ്തത്. 500 കോടി രൂപയ്ക്ക് മുകളിൽ മുതൽമുടക്കിയാണ് ചിത്രം നിർമിച്ചത്. അതുകൊണ്ടു തന്നെ ഒരു ഇന്ത്യൻ സിനിമയ്ക്ക് ലഭിക്കാവുന്ന ഏറ്റവും വലിയ റിലീസ് ആണ് ആർ ആർ ആർ ചിത്രത്തിന് ലഭിച്ചത്. സിനിമയുടെ പ്രമോഷന്റെ ഭാഗമായി നിരവധി ഭാഷകളിൽ താരങ്ങൾ അഭിമുഖങ്ങൾ നൽകിയിരുന്നു. ഇപ്പോൾ ഇതാ പ്രശസ്ത നിരൂപകനായ ഭരദ്വാജ് രംഗനുമായി നടത്തിയ അഭിമുഖത്തിൽ രാജമൗലി പറഞ്ഞ കാര്യങ്ങളാണ് സോഷ്യൽ മീഡിയയിൽ വൈറലായിരിക്കുന്നത്.
മറ്റുള്ളവർ ഒരുക്കിയ ഏതെങ്കിലും ചിത്രങ്ങൾ കണ്ടപ്പോൾ അത് സ്വയം സംവിധാനം ചെയ്യാൻ കഴിഞ്ഞിരുന്നെങ്കിൽ എന്ന് തോന്നിയിട്ടുണ്ടോ എന്നായിരുന്നു രാജമൗലിയോട് ഭരദ്വാജ് രംഗൻ ചോദിച്ചത്. അതിന് രാജമൗലി നൽകിയ മറുപടിയാണ് മലയാളികളെ ഇപ്പോൾ പുളകം കൊള്ളിച്ചിരിക്കുന്നത്. മോഹൻലാൽ നായകനായ ജീത്തു ജോസഫ് ചിത്രങ്ങളായ ദൃശ്യം, ദൃശ്യം 2 എന്നീ ചിത്രങ്ങൾ സംവിധാനം ചെയ്യാൻ കഴിഞ്ഞിരുന്നെങ്കിലെന്ന് തോന്നിയെന്നാണ് രാജമൗലി പറഞ്ഞത്. അതിനുള്ള കാരണം ആ ചിത്രങ്ങൾ അത്ര ഗംഭീരമായിരുന്നു എന്നതായിരുന്നു എന്നാതാണെന്നും രാജമൗലി വ്യക്തമാക്കി. ആദ്യഭാഗം ഗംഭീരമായിരുന്നു എങ്കിൽ രണ്ടാംഭാഗം അതിലും ത്രില്ലിംഗ് ആയിരുന്നെന്ന് ആ ചിത്രത്തിന്റെ തിരക്കഥ അത്രമാത്രം ശക്തമായിരുന്നെന്നും രാജമൗലി പറഞ്ഞു. ബുദ്ധിപരമായാണ് ആ തിരക്കഥ എഴുതിയിരിക്കുന്നതെന്നും എന്നാൽ അതേസമയം വളരെ വൈകാരികമായും ലളിതമായായും കഥ അവതരിപ്പിക്കാൻ കൂടി സാധിച്ച ചിത്രങ്ങളായിരുന്നു അതെന്നും രാജമൗലി വ്യക്തമാക്കി.
കേരളത്തിൽ മാത്രം 500ൽ അധികം സ്ക്രീനുകളിലാണ് ആർ ആർ ആർ പ്രദർശനത്തിന് എത്തിയത്. ബാഹുബലിക്ക് ശേഷം എസ് എസ് രാജമൗലി സംവിധാനം ചെയ്ത ആർ ആർ ആർ എന്ന ചിത്രത്തിൽ രാം ചരൺ, ജൂനിയർ എൻ ടി ആർ, ആലിയ ഭട്ട്, അജയ് ദേവ്ഗൺ എന്നിവരാണ് പ്രധാനവേഷങ്ങളിൽ എത്തുന്നത്. ആദ്യദിവസം തന്നെ ചിത്രത്തിന് മികച്ച പ്രതികരണമാണ് ലഭിച്ചത്. തീര്‍ച്ചയായും തീയറ്ററില്‍ എക്‌സ്പീരിയന്‍ ചെയ്യേണ്ട ചിത്രമാണ് ആർ ആർ ആര്‍ എന്ന് പേര്‍ളി മാണി പറഞ്ഞു. ഇംഗ്ലീഷ് ചിത്രങ്ങള്‍ മാത്രമല്ല, ഇന്ത്യന്‍ സിനിമകളും ലോകോത്തര നിലവാരത്തിലേക്ക് എത്തുന്നു എന്നതിന് തെളിവാണ് ചിത്രം. ഫുള്‍ ടൈം രോമാഞ്ചം നല്‍കുന്നതാണ് ആർ ആർ ആര്‍ എന്നും പേര്‍ളി പറഞ്ഞു. പ്രതീക്ഷിച്ചതിൽ അധികം നല്‍കാന്‍ ആർ ആർ ആറിന് കഴിഞ്ഞുവെന്ന് നടി സരയു പറഞ്ഞു. ഗംഭീര എക്‌സ്പീരിയന്‍സ് ആയിരുന്നുവെന്നും കുറച്ചു നാളുകള്‍ക്ക് ശേഷം തിയറ്ററുകളെ ഇളക്കി മറിക്കാന്‍ ചിത്രത്തിന് കഴിഞ്ഞെന്നും സരയു പറഞ്ഞു.
