മിനിസ്ക്രീൻ പ്രേക്ഷകരുടെ ഇഷ്ടപ്പെട്ട റിയാലിറ്റി ഷോയിൽ ഒന്നാണ് സ്റ്റാർ മാജിക്. ഷോ പോലെ തന്നെ സ്റ്റാർ മാജിക്കിലെ താരങ്ങളും പ്രേക്ഷകർക്ക് പ്രിയപ്പെട്ടവരാണ്. അതുകൊണ്ടു തന്നെ അവരുടെ വ്യക്തിപരമായ സന്തോഷങ്ങളും കാര്യങ്ങളും എല്ലാം എപ്പോഴും ആവേശത്തോടെയാണ് മിനിസ്ക്രീൻ പ്രേക്ഷകർ ഏറ്റെടുക്കാറുള്ളത്. സ്റ്റാർ മാജിക്കിലെ എല്ലാ താരങ്ങളെയും പോലെ പ്രേക്ഷകർക്ക് ഒരുപാട് പ്രിയപ്പെട്ട ഒരി താരമാണ് തങ്കച്ചൻ വിതുര. തങ്കച്ചൻ ഇപ്പോൾ വിവാഹിതനാകാൻ പോകുന്നു എന്ന വാർത്തയാണ് പ്രേക്ഷകർക്ക് ഇടയിലേക്ക് പുതുതായി എത്തിയിരിക്കുന്നത്.
സ്റ്റാർ മാജിക് അവതാരക ആയ ലക്ഷ്മി നക്ഷത്ര തന്റെ യുട്യൂബ് ചാനലിലൂടെയാണ് ഇക്കാര്യം പങ്കുവെച്ചത്. റേഡിയോ ജോക്കിയായി കരിയർ ആരംഭിച്ച ലക്ഷ്മി സ്റ്റാർ മാജിക് അവതാരകയായി പ്രേക്ഷകരുടെ മനസിൽ ഇടം നേടുകയായിരുന്നു. ലക്ഷ്മിയുടെ യുട്യൂബ് ചാനലിൽ സ്റ്റാർ മാജിക് താരങ്ങളുടെ വിശേഷങ്ങളും പങ്കുവെയ്ക്കാറുണ്ട്. സഹതാരങ്ങളുടെ വീടുകളിൽ പോയും അവർക്കൊപ്പം പാചകവീഡിയോകൾ ചെയ്തുമാണ് വ്യത്യസ്ത തരത്തിലുള്ള വീഡിയോകളാണ് ലക്ഷ്മി തന്റെ യുട്യൂബ് ചാനലിൽ അപ് ലോഡ് ചെയ്യാറുള്ളത്. ഇത്തവണ, സ്റ്റാർ മാജിക് താരമായ തങ്കച്ചൻ വിതുരയുടെ നാട്ടിൽ പോയി അവിടെ നിന്നുള്ള വീഡിയോ ആണ് പങ്കുവെച്ചത്.
മൂന്ന് ഭാഗമായി ചെയ്ത വീഡിയോയിൽ ഒന്നിലാണ് തങ്കച്ചന്റെ വിവാഹക്കാര്യം ലക്ഷ്മി നക്ഷത്ര പറയുന്നത്. ‘തങ്കു ഈസ് കമ്മിറ്റഡ് നൗ’ തങ്കച്ചൻ വിവാഹിതനാകാൻ പോകുകയാണെന്ന കാര്യം ലക്ഷ്മി നക്ഷത്ര അറിയിച്ചത് ഇങ്ങനെ. തങ്കുവിന്റെ കല്യാണമാണ്, എപ്പോഴാണ് തങ്കുവിന്റെ കല്യാണം എന്ന് ലക്ഷ്മി ചോദിക്കുമ്പോൾ അതൊക്കെ ഉണ്ട് എന്ന മറുപടിയാണ് തങ്കച്ചൻ നൽകുന്നത്. ആരാണെന്ന് തനിക്കറിയാമെന്നും തന്നെ കാണിച്ചു തന്നിട്ടുണ്ടെന്നും എന്നാൽ താനത് ഇപ്പോൾ പറയില്ലെന്നും ലക്ഷ്മി വ്യക്തമാക്കുന്നു. തങ്കുവിന്റെ ഒരു ലവ് കം അറേഞ്ച്ഡ് മാര്യേജ് ഉടനെ ഉണ്ടാകുമെന്ന് ലക്ഷ്മി പറയുമ്പോൾ തീർച്ചയായും എന്ന മറുപടി തങ്കച്ചൻ നൽകുന്നുണ്ട്. നേരത്തെ സ്റ്റാർ മാജികിലെ മറ്റൊരു താരം അനുവിനെയും ചേർത്ത് തങ്കച്ചന്റെ പേര് പറഞ്ഞുകേട്ടിരുന്നു. എന്നാൽ, സത്യാവസ്ഥ താരങ്ങൾ തന്നെ തുറന്നു പറഞ്ഞിരുന്നു.
