ധ്യാൻ ശ്രീനിവാസൻ തിരക്കഥയും സംവിധാനവും നിർവഹിക്കുന്ന ചിത്രമാണ് ‘ലവ് ആക്ഷൻ ഡ്രാമ’. മലയാളത്തിലെ യുവതാരം നിവിൻ പോളിയും തെന്നിന്ത്യൻ താരറാണി നയൻതാരയും ആണ് ചിത്രത്തിലെ നായിക നായകന്മാർ. ചിത്രത്തിൽ നിവിൻ പോളി ദിനേശൻ എന്ന കഥാപാത്രത്തെയും നയൻതാര ശോഭ എന്ന കഥാപാത്രത്തെയുമാണ് അവതരിപ്പിക്കുന്നത്. ശ്രീനിവാസൻ, അജു വർഗീസ്, മല്ലികാ സുകുമാരൻ, ജൂഡ് ആന്റണി എന്നിവരാണ് മറ്റു പ്രധാന കഥാപാത്രങ്ങൾ. വർഷങ്ങൾക്കു മുൻപേ ധ്യാൻ തിരക്കഥ പൂർത്തിയാക്കിയ, അജു വർഗീസ്,വിശാഖ് സുബ്രമണ്യം എന്നിവർ ചേർന്ന് നിർമ്മിക്കുന്ന ഈ ചിത്രം അജുവർഗീസിന്റെ പ്രേരണ കൊണ്ടാണ് ഒടുവിൽ സിനിമയായത്.കഴിഞ്ഞ വർഷം അവസാനം റിലീസ് ചെയ്യേണ്ടിയിരുന്ന ചിത്രമാണ് ഇതെങ്കിലും നിവിന്റെ തിരക്കുകൾ മൂലം ചിത്രത്തിന്റെ ഷൂട്ടിംഗ് നീട്ടി വെക്കേണ്ടി വന്നു.
ചിത്രത്തിന്റെ ചിത്രീകരണ ലൊക്കേഷനിൽ ഒരു അപ്രതീക്ഷിത അതിഥി ഇപ്പോൾ വന്നിരിക്കുകയാണ്. മോഹൻലാലിൻറെ ഭാര്യ സുചിത്ര മോഹൻലാലാണ് ചിത്രത്തിലെ ഷൂട്ടിംഗ് ലൊക്കേഷനിൽ എത്തിയത്. ചെന്നൈയിലാണ് ചിത്രത്തിൻറെ ഷൂട്ടിംഗ് ഇപ്പോൾ പുരോഗമിക്കുന്നത്. ചിത്രത്തിലെ നിർമ്മാതാക്കളിൽ ഒരാളായ വിശാഖ് സുബ്രമണ്യത്തിന്റെ കസിൻ സിസ്റ്റർ ആണ് സുചിത്ര മോഹൻലാൽ. ഈ ബന്ധത്തിന്റെ പുറത്താണ് ചിത്രീകരണം കാണുവാൻ വേണ്ടി സുചിത്ര മോഹൻലാൽ ലൊക്കേഷനിൽ എത്തിയത്.ലൊക്കേഷനിൽ എത്തിയ സുചിത്ര മോഹൻലാൽ ധ്യാൻ ശ്രീനിവാസനെ നേരിട്ട് കണ്ട് ആശംസകൾ അറിയിച്ചു. അതേസമയം ചെന്നൈയിൽ ചിത്രത്തിന്റെ അവസാന ഘട്ട ഷൂട്ടിങ് ഇപ്പോൾ പുരോഗമിക്കുന്നത്. ചിത്രീകരണം പൂർത്തിയാക്കി പോസ്റ്റ് പ്രൊഡക്ഷൻ ജോലികളിലേക്ക് ചിത്രം കടക്കും. ഓണം റിലീസായി ചിത്രം തിയേറ്ററുകളിലെത്തും.
