ഉറക്കഗുളിക കഴിച്ചത് അമിതമായി പോയതാണെന്നും താൻ ആത്മഹത്യയ്ക്ക് ശ്രമിച്ചതല്ലെന്നും യുവനടി. അമിതമായ അളവിൽ ഉളക്കഗുളിക കഴിച്ചതിനെ തുടർന്ന് കൊച്ചിയിലെ ആശുപത്രിയിലെ നടി പ്രവേശിപ്പിക്കപ്പെട്ടിരുന്നു. ഇതിനെ തുടർന്ന് പൊലീസ് എടുത്ത മൊഴിയിലാണ് താൻ ആത്മഹത്യാശ്രമം നടത്തിയിട്ടില്ലെന്നും ഉറക്കഗുളികയുടെ ഡോസ് അമിതമായി പോയതാണെന്നും നടി വിശദമാക്കിയത്.
എന്നാൽ, ഇക്കാര്യം പൊലീസ് മുഖവിലയ്ക്ക് എടുത്തിട്ടില്ല. ഉറക്കഗുളിക കഴിച്ച് അവശയായ നിലയിൽ നടിയെ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു. ഇവർ അപകടനില തരണം ചെയ്തു കഴിഞ്ഞെന്നാണ് റിപ്പോർട്ടുകൾ.
നടി ആക്രമിക്കപ്പെട്ട കേസുമായി ചില പുതിയ സംഭവവികാസങ്ങൾ ഉണ്ടായ പശ്ചാത്തലത്തിലാണ് നടി ആത്മഹത്യയ്ക്ക് ശ്രമിച്ചതെന്ന തരത്തിലുള്ള റിപ്പോർട്ടുകൾ സാമൂഹ്യ മാധ്യമങ്ങളിൽ ഉയർന്നിരുന്നു. നടി ആക്രമിക്കപ്പെട്ട കേസിൽ കൂറു മാറിയവരുടെ സാമ്പത്തിക ഇടപാടുകൾ പരിശോധിക്കുമെന്ന് അന്വേഷണസംഘം കഴിഞ്ഞദിവസം വ്യക്തമാക്കിയിരുന്നു.
