മലയാളി പ്രേക്ഷകർ ഇന്നുവരെ കണ്ടിട്ടില്ലാത്ത ഒരു ചോരക്കളിയുമായി രോഹിത് വി എസ് സംവിധാനം നിർവഹിച്ച കള മികച്ച പ്രതികരണം നേടി പ്രദർശനം തുടരുകയാണ്. ഷാജി എന്ന വ്യക്തിയുടെ ജീവിതത്തിലും കുടുംബത്തിലും നടക്കുന്ന ചില സംഭവങ്ങളാണ് ചിത്രത്തിൽ അവതരിപ്പിച്ചിരിക്കുന്നത്. ഒരു ദിവസത്തെ സംഭവവികാസങ്ങളാണ് പ്രേക്ഷകന് മുന്നിൽ അവതരിപ്പിച്ചിരിക്കുന്നത്. എ സർട്ടിഫിക്കറ്റ് ലഭിച്ചിരുന്നതിനാൽ തന്നെ ചിത്രം അതിന്റെ പൂർണതയിൽ തന്നെയാണ് പ്രേക്ഷകരിലേക്ക് എത്തിയിരിക്കുന്നത്.
പ്രതികാരമാണെന്ന് ഒറ്റ നോട്ടത്തിൽ തോന്നുമെങ്കിലും അതിലുമേറെ തലങ്ങളിലൂടെയാണ് ചിത്രം സഞ്ചരിക്കുന്നത്. നഷ്ടപ്പെടലിന്റെ വേദനയും ചിത്രം പങ്ക് വെക്കുന്നുണ്ട്. ടോവിനോയുടെ പ്രകടനത്തോടൊപ്പം തന്നെ തുല്യപ്രാധാന്യമാണ് സുമേഷ് മൂർ അവതരിപ്പിച്ചിരിക്കുന്ന കഥാപാത്രത്തിന്റേതും. ചില രംഗങ്ങളിൽ ടോവിനോയെക്കാൾ കൂടുതൽ കൈയ്യടി നേടിയതും സുമേഷാണ്. പതിനെട്ടാം പടിയിലൂടെ പ്രേക്ഷകർക്ക് സുപരിചിതനായ സുമേഷ് തനിക്ക് കിട്ടിയ ഒരു മുഴുനീള കഥാപാത്രത്തെ മനോഹരമാക്കുക മാത്രമല്ല, എന്നും ഓർത്തിരിക്കുവാൻ തക്ക ഒന്നാക്കി തീർക്കുകയും ചെയ്‌തു. ഈ കലാകാരനെ തേടി ഇനിയും ഏറെ ചിത്രങ്ങൾ വരുമെന്ന് നിസംശയം തന്നെ പറയാം.
