നവാഗതനായ സനൂപ് തൈക്കൂടം സംവിധാനം ചെയ്യുന്ന ‘സുമേഷ് & രമേഷ്’ എന്ന ചിത്രത്തിന്റെ ട്രെയ്‌ലര്‍ പുറത്തിറങ്ങി. ശ്രീനാഥ് ഭാസി, ബാലു വര്‍ഗീസ് എന്നിവരെ കേന്ദ്ര കഥാപാത്രങ്ങളാക്കിയാണ് ചിത്രം ഒരുക്കിയിരിക്കുന്നത്. ചിത്രം നവംബര്‍ 26ന് തീയറ്ററുകളില്‍ എത്തും. നര്‍മ്മത്തിന് പ്രാധാന്യം നല്‍കി ചെയ്യുന്ന ചിത്രമാണ് ‘സുമേഷ് & രമേഷ്’.
വൈറ്റ്സാന്‍ഡ്സ് മീഡിയ ഹൗസിന്റെ ബാനറില്‍ കെ എല്‍ 7 എന്റര്‍ടൈന്‍മെന്റ്‌സുമായി ചേര്‍ന്ന് ഫരീദ്ഖാന്‍ നിര്‍മ്മിക്കുന്ന ചിത്രമാണ് ‘സുമേഷ് & രമേഷ്’. ചിത്രത്തിന്റെ ഛായാഗ്രഹണം ആല്‍ബിയും എഡിറ്റിംഗ് അയൂബ് ഖാനും ആണ്. സംഗീത സംവിധാനം യാക്‌സണ്‍ ഗാരി പെരേര, നേഹ എസ് നായര്‍ എന്നിവര്‍ ചേര്‍ന്നാണ്. സനൂപ് തൈക്കുടവും ജോസഫ് വിജീഷും ചേര്‍ന്നാണ് തിരക്കഥയൊരുക്കിയിരിക്കുന്നത്.
ചങ്ക്സ് എന്ന ചിത്രത്തിന്റെ സഹ തിരക്കഥാകൃത്ത് ആയിരുന്നു സനൂപ്. തന്റെ സുഹൃത്തുക്കളുടെ ജീവിതത്തില്‍ നിന്നുള്ള യഥാര്‍ത്ഥ സംഭവങ്ങളില്‍ നിന്നാണ് സുമേഷും രമേഷും സിനിമയുടെ പ്രചോദനമെന്ന് സംവിധായകനായ സനൂപ് നേരത്തെ പറഞ്ഞിട്ടുണ്ട്. തന്റെ സിനിമയുടെ പ്രധാന അടിത്തറ അതാണെന്നും കുടുംബത്തിന്റെ ആംഗിള്‍ പരമാവധി ലഭിക്കാനാണ് സഹോദരങ്ങളെ പ്രധാന കഥാപാത്രങ്ങളാക്കിയതെന്നും സനൂപ് നേരത്തെ പറഞ്ഞിരുന്നു.
