മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന ചിത്രമായ ബ്രോ ഡാഡിയുടെ ട്രയിലർ കഴിഞ്ഞദിവസമാണ് റിലീസ് ആയത്. വളരെ ആവേശത്തോടെയാണ് ആരാധകർ ട്രയിലറിനായി കാത്തിരുന്നത്. ഗംഭീര വരവേൽപ്പാണ് ട്രയിലറിന് ലഭിച്ചത്. ട്രയലറിൽ നിന്ന് ചിത്രം മികച്ച എന്റർടയിനറാണെന്ന പ്രതീക്ഷയാണ് ആരാധകർക്ക്.
ട്രയിലർ ഹിറ്റ് ആകുന്നതിനിടയിൽ ട്രയിലറിന് ഉള്ളിൽ ഒളിപ്പിച്ചിരിക്കുന്ന അധികം ആരുടെയും ശ്രദ്ധയിൽപ്പെടാതെ പോയ ഒരു രഹസ്യമാണ് സോഷ്യൽ മീഡിയ കണ്ടെത്തിയിരിക്കുന്നത്. വർണപ്പകിട്ട് എന്ന ചിത്രത്തിൽ സണ്ണി പാലമറ്റം, സാന്ദ്ര എന്നീ കഥാപാത്രങ്ങളായിട്ട് ആയിരുന്നു മോഹൻലാലും മീനയും എത്തിയത്. സണ്ണിയുടെയും സാന്ദ്രയുടെയും ചിത്രമാണ് ബ്രോ ഡാഡിയിൽ കാണാൻ കഴിയുന്നത്. ബ്രോ ഡാഡിയില്‍ ജോൺ കാറ്റാടി, അന്നമ്മ ദമ്പതികളായാണ് മോഹൻലാലും മീനയും എത്തുന്നത്.
ഇവരുടെ ചെറുപ്പകാല ചിത്രമായാണ് വർണപ്പകിട്ടിലെ ഫോട്ടോ ഉൾപ്പെടുത്തിയിരിക്കുന്നത്. നിരവധി സോഷ്യൽ മീഡിയ പ്ലാറ്റ്ഫോമുകളിലാണ് ഫോട്ടോ പങ്കുവയ്ക്കപ്പെടുന്നത്. മീനയും ചിത്രം ഷെയർ ചെയ്തിട്ടുണ്ട്. കോമഡിക്ക് പ്രാധാന്യം നൽകിയുള്ള ചിത്രമാണ് ബ്രോ ഡാഡി എന്നാണ് ട്രെയ്‌ലറിൽ നിന്ന് വ്യക്തമാക്കുന്നത്. ഡിസ്‌നി പ്ലസ് ഹോട്സ്റ്റാർ വഴി ജനുവരി 26ന് ചിത്രം പ്രേക്ഷകർക്ക് മുന്നിലെത്തും.
