ഒരു ഇടവേളയ്ക്ക് ശേഷമുള്ള തന്റെ തിരിച്ചുവരവിന് ഗംഭീര വരവേൽപ്പ് നൽകിയ പ്രേക്ഷകർക്ക് നന്ദി പറഞ്ഞ് നടൻ സുരേഷ് ഗോപി. ഫേസ്ബുക്ക് പോസ്റ്റിലാണ് സുരേഷ് ഗോപി നന്ദി അറിയിച്ചത്. ‘നന്ദി… തിയേറ്ററുകൾക്ക് കാവലായതിന്.. നമ്മുടെ സിനിമയ്ക്ക് കാവലായതിന്.. എനിക്ക് കാവലായതിന്..’ കൈകൂപ്പി നിൽക്കുന്ന തന്റെ ചിത്രത്തിനൊപ്പം സുരേഷ് ഗോപി ഇങ്ങനെ കുറിച്ചു.
നിരവധി പേരാണ് കമന്റ് ബോക്സിൽ ആശംസകളുമായി എത്തിയത്. ‘ചങ്ക് പറിച്ചു കൂടെ നിൽക്കും സുരേഷേട്ടന് വേണ്ടി കാവൽ ആയി അതിൽ പരം ഒരു വാക്ക് എനിക്ക് പറയാൻ ഇല്ല’ കമന്റ് ബോക്സിൽ ഒരു ആരാധകൻ കുറിച്ചത് ഇങ്ങനെ. അതേസമയം, ഇന്ന് കാവൽ സിനിമയുടെ വിജയാഘോഷം തിരുവനന്തപുരം മാൾ ഓഫ് ട്രാവൻകൂറിൽ നടന്നിരുന്നു. സുരേഷ് ഗോപി, നിധിൻ രൺജി പണിക്കർ തുടങ്ങി സിനിമയിലെ താരങ്ങളും അണിയറപ്രവർത്തകരും വിജയാഘോഷത്തിനായി എത്തിയിരുന്നു.
ഹൗസ്ഫുൾ ഷോകളുമായി കാവൽ തിയറ്ററുകളിൽ പ്രദർശനം തുടരുകയാണ്. കേരളത്തില്‍ മാത്രം 220 സ്‌ക്രീനുകളിലായിരുന്നു ചിത്രം പ്രദര്‍ശനത്തിന് എത്തിയത്. സുരേഷ് ഗോപി ആരാധകരെ മാത്രമല്ല ഫാമിലി ആക്ഷൻ സിനിമകൾ ഇഷ്ടപ്പെടുന്ന എല്ലാ പ്രേക്ഷകരെയും തൃപ്തിപ്പെടുത്തുന്ന വിധമാണ് സിനിമ. ചിത്രത്തിന്റെ രചനയും സംവിധാനവും നിധിൻ രൺജി പണിക്കരാണ്. കോവിഡ് രണ്ടാം തരംഗത്തിനു ശേഷം തിയറ്ററുകളിലേക്ക് ആദ്യമെത്തിയ സൂപ്പർതാര ചിത്രം കൂടിയായിരുന്നു കാവൽ.
