മലയാളത്തിലെ സൂപ്പർസ്റ്റാർ ആയിരുന്ന സുരേഷ് ഗോപി ചെറിയ ഒരു ഇടവേളയ്ക്കു ശേഷം അനൂപ് സത്യൻ സംവിധാനം ചെയ്ത് ദുൽഖർസൽമാൻ നിർമ്മിച്ച വരനെ ആവശ്യമുണ്ട് എന്ന ചിത്രത്തിലൂടെ മികച്ച തിരിച്ചുവരവ് നടത്തിയിരിക്കുകയാണ്. ചിത്രത്തിൽ സുരേഷ് ഗോപിക്കൊപ്പം ശോഭന, കല്യാണി പ്രിയദർശൻ എന്നിവരും ദുൽഖർ സൽമാനും ഒരു പ്രധാന വേഷത്തെ അവതരിപ്പിക്കുന്നുണ്ട്. കോമെഡിയും ആക്ഷനും വൈകാരിക മുഹൂർത്തങ്ങളുമെല്ലാമായി ഗംഭീര പ്രകടനമാണ് സുരേഷ് ഗോപി മേജർ ഉണ്ണികൃഷ്ണൻ എന്ന കഥാപാത്രത്തിലൂടെ ചിത്രത്തിൽ കാഴ്ചവച്ചത്. താൻ അഭിനയിച്ച ചിത്രങ്ങൾ ടിവിയിൽ വരുമ്പോൾ കാണാറില്ല എന്നും പഴയ മലയാളസിനിമകൾ കാണുന്നതിനു പകരം താൻ കാണുന്നത് പഴയ ഹിന്ദി തമിഴ് ചിത്രങ്ങളാണ് എന്നും സുരേഷ് ഗോപി പറയുന്നു.
അതോടൊപ്പം മലയാളത്തിന്റെ മെഗാസ്റ്റാർ മമ്മൂട്ടി അഭിനയിച്ച പ്രാഞ്ചിയേട്ടൻ ആൻഡ് ദി സെയിന്റ് എന്ന ചിത്രം താൻ 20 തവണയെങ്കിലും കണ്ടിട്ടുണ്ടെന്നും സുരേഷ്ഗോപി തുറന്നുപറഞ്ഞു. അതൊരു സിനിമയാണെന്ന് തനിക്ക് ഇതുവരെ തോന്നിയിട്ടില്ലെന്നും കണ്ണിനു മുൻപിൽ നടക്കുന്ന സംഭവങ്ങൾ പോലെയാണ് രഞ്ജിത്ത് ചിത്രത്തെ അവതരിപ്പിച്ചിരിക്കുന്നത് എന്നും സുരേഷ് ഗോപി പറയുന്നു. അതുപോലെ ജയസൂര്യ അഭിനയിച്ച കോക്‌ടെയിൽ എന്ന ചിത്രവും താൻ അഞ്ചോളം തവണ കണ്ടിട്ടുണ്ടെന്നും അദ്ദേഹം പറയുന്നുണ്ട്.
