മലയാളികളുടെ പ്രിയപ്പെട്ട നടന്മാരിൽ ഒരാളായ അനൂപ് മേനോൻ നായകനായി എത്തുന്ന ഏറ്റവും പുതിയ ചിത്രമാണ് 21 ഗ്രാംസ്. ഒരു ഇൻവെസ്റ്റിഗേഷൻ ത്രില്ലർ ആയി ഒരുക്കിയിരിക്കുന്ന ഈ ചിത്രത്തിന്റെ ആദ്യ ടീസർ പുറത്തു വന്നു കഴിഞ്ഞു. ആദ്യാവസാനം ഉദ്വേഗജനകമായ ഒരു കുറ്റാന്വേഷണ ചിത്രമായിരിക്കും ഇതെന്നുള്ള സൂചനയാണ് ആദ്യ ടീസർ നമ്മുക്ക് നൽകുന്നത്. ബിബിൻ കൃഷ്ണ രചിച്ചു സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് ദി ഫ്രണ്ട് റോ പ്രൊഡക്ഷൻസിന്റെ ബാനറിൽ റിനീഷ് കെ എൻ ആണ്.
അനൂപ് മേനോനോടൊപ്പം ഒരു വലിയ താരനിര തന്നെ ഈ ചിത്രത്തിൽ അണിനിരക്കുന്നുണ്ട്. ലിയോണ ലിഷോയ്, അനു മോഹൻ, രഞ്ജി പണിക്കർ, രഞ്ജിത്, ലെന, നന്ദു, ശങ്കർ രാമകൃഷ്ണൻ, ചന്ദുനാഥ്, മാനസ രാധാകൃഷ്ണൻ, പ്രശാന്ത് അലക്സാണ്ടർ, ജീവ ജോസഫ്, മേഘനാഥ റിനീഷ്, അജി ജോൺ, വിവേക് അനിരുദ്ധ്, മറീന മൈക്കൽ, ബിനീഷ് ബാസ്റ്റിൻ, ദിലീപ് നമ്പ്യാർ, നോബിൾ ജേക്കബ് എന്നിവരാണ് ഇതിലെ മറ്റു താരങ്ങൾ.
ജിത്തു ദാമോദർ കാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് അപ്പു എൻ ഭട്ടതിരി ആണ്. ദീപക് ദേവ് ആണ് ഈ ചിത്രത്തിന് സംഗീതം പകർന്നിരിക്കുന്നത്. കിംഗ് ഫിഷ്, വരാൽ, പദ്മ എന്നീ ചിത്രങ്ങളും അനൂപ് മേനോൻ നായകനായി ഇനി വരാനുള്ള ചിത്രങ്ങളാണ്. ഇതിൽ കിംഗ് ഫിഷ് അദ്ദേഹം സംവിധാനം ചെയ്ത ചിത്രം കൂടിയാണ്.
