കൊവിഡ് മൂലം ചിത്രീകരണം പാതിവഴിയിൽ മുടങ്ങി പോയ നിരവധി മലയാള സിനിമകൾ ഇപ്പോഴുമുണ്ട്. ഇപ്പോഴിതാ മമ്മൂട്ടിയും മഞ്ജു വാര്യരുടെ കേന്ദ്ര കഥാപാത്രങ്ങളായി എത്തുന്ന ദ് പ്രീസ്റ്റ് എന്ന ചിത്രത്തിന്റെ ചിത്രീകരണം പൂർത്തിയായെന്ന് അണിയറപ്രവർത്തകർ സോഷ്യൽ മീഡിയയിലൂടെ അറിയിച്ചിരിക്കുകയാണ്.
കൊവിഡ് നിയന്ത്രണങ്ങളോടെ ആരംഭിച്ച ചിത്രത്തിന്റെ അവസാന ഷെഡ്യൂള്‍ ഇന്ന് പൂര്‍ത്തിയായി എന്നാണ് ചിത്രങ്ങൾ അടക്കം പങ്കുവച്ചു കൊണ്ട് കുറിച്ചത്.
ചിത്രത്തിലെ മമ്മൂട്ടിയുടെ രംഗങ്ങള്‍ നേരത്തെ തന്നെ ചിത്രീകരിച്ചിരുന്നതാണ്. മഞ്ജു വാര്യര്‍ ഉള്‍പ്പെടുന്ന ഭാഗങ്ങളാണ് അവസാന ഷെഡ്യൂളിലേക്ക് മാറ്റി വച്ചത്. ജോഫിന്‍ ടി ചാക്കോയാണ് ചിത്രത്തിന്റെ സംവിധാനം. ചിത്രം ആന്റോ ജോസഫും ബി ഉണ്ണിക്കൃഷ്ണനും ചേര്‍ന്നാണ് നിര്‍മ്മിക്കുന്നത്.
ചിത്രത്തിൽ മമ്മൂട്ടിക്കും മഞ്ജു വാര്യര്‍ക്കുമൊപ്പം നിഖില വിമല്‍, ശ്രീനാഥ് ഭാസി, മധുപാല്‍, കൈദി ഫെയിം ബേബി മോണിക്ക, ജഗദീഷ്, എന്നിവരും പ്രധാന കഥാപാത്രത്തിൽ എത്തുന്നുണ്ട്. ആന്റോ ജോസഫ് ഫിലിം കമ്പനിയും ആര്‍.ഡി ഇലുമിനേഷന്‍സും ചേര്‍ന്നാണ് നിര്‍മ്മാണം ഏറ്റെടുത്തത്. ശ്യാം മേനോനും ദീപു പ്രദീപുമാണ് പ്രീസ്റ്റിന്റെ തിരക്കഥ നിർവഹിക്കുന്നത്. രാഹുല്‍ രാജ് ആണ് ചിത്രത്തിന്റെ സംഗീത സംവിധാനം.
