പാട്ടു കൊണ്ടു മലയാളികളുടെ മനസ് കീഴടക്കിയ താരമാണ് റിമി ടോമി. സ്റ്റേജിലാകട്ടെ ടിവിയിലെ ചാറ്റ് ഷോയിലാകട്ടെ, പെർഫോമൻസിലൂടെ മലയാളിക്ക് ഇത്രയേറെ പോസിറ്റീവ് എനർജി പകർന്നു നൽകുന്ന ഒരു ഗായിക വേറെുണ്ടോയെന്ന് സംശയമാണ്. പാട്ടും ഡാൻസുമായി വേദി കീഴടക്കി മുന്നേറുന്ന റിമി പെട്ടെന്നാണ് മെലിഞ്ഞു സുന്ദരിയായി എത്തിയത്. എങ്ങനെ ഇങ്ങനെ സാധിച്ചു എന്ന ഒറ്റച്ചോദ്യമാണ് ആരാധകർക്ക്. അവർക്കു വേണ്ടി റിമി മനസു തുറന്നു. വനിത ഓൺലൈനിന് നൽകിയ അഭിമുഖത്തിലാണ് തന്റെ സൗന്ദര്യരഹസ്യം റിമി വെളിപ്പെടുത്തിയത്.
ശരീരത്തിന്റെ ഭാരം കുറഞ്ഞ് വരുമ്പോൾ ആകെ ഒരു വ്യത്യാസം തോന്നുമെന്നും സ്റ്റേജ് പെർഫോമൻസിനും ആരോഗ്യത്തിനുമെല്ലാം ഒരു രൂപമാറ്റം അനിവാര്യമായി തോന്നിയെന്നും റിമി പറയുന്നു. വ്യായാമം മുടങ്ങാതെ ചെയ്യാറുണ്ട്. കൊച്ചിയിലും തിരുവനന്തപുരത്തും ആണെങ്കിൽ ജിമ്മുകളിൽ വർക് ഔട്ട് ചെയ്യുമെന്നും അത് മുടക്കാറില്ലെന്നും റിമി വ്യക്തമാക്കുന്നു. 70 ശതമാനം ആഹാര നിയന്ത്രണവും 30 ശതമാനം വർക് ഔട്ടും എന്നാണല്ലോ എന്നും റിമി ചോദിക്കുന്നു. ബ്രേക്ക് ഫാസ്റ്റ് ആയി കഴിക്കുന്നത് പാലിൽ പ്രഭാതഭക്ഷണത്തിന് ആവശ്യമായ പോഷകങ്ങൾ ചേർത്തു തയ്യാറാക്കുന്ന ന്യൂട്രിഷണൽ ഷെയ്ക്ക്. ഇടയ്ക്ക് രണ്ട് ഇഡ്ഡലിയോ ദോശയോ കഴിക്കും. കേരളത്തിലാണെങ്കിൽ ഉച്ചയ്ക്ക് ചോറ് കഴിക്കും. കൂടെ തോരൻ പുളിശ്ശേരി, ചമ്മന്തി, മീൻ വറുത്തത് എന്നിവ കഴിക്കാൻ ഇഷ്ടമാണ്.
അതേസമയം, ചിക്കനും മീനും ഒന്നിച്ച് കഴിക്കാറില്ല റിമി. രാത്രിയിൽ ചോറും ചപ്പാത്തിയും ഒഴിവാക്കി. ഒന്നുകിൽ ചിക്കൻ വിത്ത് സാലഡ് അല്ലെങ്കിൽ ഫിഷ് വിത്ത് സാലഡ് ആയിരിക്കും കഴിക്കുക. എന്നാൽ, യാത്രകളിൽ ഇഷ്ടമുള്ളതൊക്കെ കഴിക്കുമെന്നും റിമി വ്യക്തമാക്കുന്നു. രാത്രി നേരത്ത് കാർബോഹൈഡ്രേറ്റ് ഒഴിവാക്കും. മാത്രമല്ല, ദിവസവും മൂന്നര ലിറ്റർ വെള്ളമെങ്കിലും കുടിക്കുമെന്നും റിമി വ്യക്തമാക്കുന്നു. ഉച്ചഭക്ഷണത്തിന് അരമണിക്കൂർ മുമ്പായി രണ്ടു ലിറ്റർ വെള്ളവും ഉച്ചഭക്ഷണം കഴിഞ്ഞ് അരമണിക്കൂർ കഴിഞ്ഞ് ഒന്നര ലിറ്റർ വെള്ളവും കുടിക്കും. പഞ്ചസാര പൂർണമായും ഒഴിവാക്കിയ റിമി എണ്ണയിൽ വറുത്ത സ്നാക്സും ഇപ്പോൾ കഴിക്കാറില്ല. പപ്പായയും ഞാലിപ്പൂവൻ പഴവുമാണ് പഴങ്ങളിൽ ഇഷ്ടം.
