കോവിഡ് നിയന്ത്രണങ്ങളിൽ ഇളവ് വരുത്തുന്നതിന്റെ ഭാഗമായി ‘അൺലോക്ക് 5’ മാർഗ്ഗനിർദ്ദേശങ്ങൾ പുറത്തുവന്നു. ഒക്ടോബർ 15 ഓടെ സ്കൂളുകളും കോളേജുകളും തുറക്കുവാൻ ആണ് തീരുമാനം. കണ്ടെയ്ൻമെന്റ് സോൺ അല്ലാത്ത സ്ഥലങ്ങളിലെ തിയേറ്ററുകളും മൾട്ടിപ്ലക്സുകളും 50 ശതമാനം ആളുകളോടുകൂടി തുറന്നു പ്രവർത്തിക്കാം. സ്കൂളുകളും കോളേജുകളും തുറക്കാമെന്ന അനുമതി കേന്ദ്രം നൽകിയെങ്കിലും അന്തിമതീരുമാനം സംസ്ഥാനങ്ങളുടെയും വിദ്യാഭ്യാസ സ്ഥാപനങ്ങളുടെയും ആയിരിക്കുമെന്നും അറിയിച്ചിട്ടുണ്ട്. സമാന്തരമായി ഓൺലൈൻ ക്ലാസുകളും ഉണ്ടാവും.
തിയേറ്ററുകൾക്ക് വേണ്ടിയുള്ള വിശദമായ മാർഗ്ഗനിർദ്ദേശം ഉടൻതന്നെ പുറത്തുവരും. ആളുകളുടെ എണ്ണം നിയന്ത്രിച്ചുകൊണ്ട് പ്രദർശന ഹാളുകളും വിനോദ പാർക്കുകളും തുറക്കുവാനും അനുമതി നൽകിയിട്ടുണ്ട്. മാർച്ച് 24 നായിരുന്നു സമ്പൂർണ്ണ ലോക്ക് ഡൗൺ പ്രഖ്യാപിച്ചിരുന്നത്. അതിൽ നിന്നും സാധാരണ ഗതിയിലേക്ക് ആളുകൾ മാറുകയാണ്. എന്നാൽ കൊറോണാ കേസുകൾ ഏറ്റവും മൂർദ്ധന്യാവസ്ഥയിൽ നിൽക്കുന്ന സമയത്താണ് ഇളവുകൾ പ്രഖ്യാപിച്ചത് എന്നത് ശ്രദ്ധേയം തന്നെയാണ്. 80,472 പുതിയ കേസുകളുമായി ആകെ കോവിഡ് ബാധിതരുടെ എണ്ണം 62 ലക്ഷം കടന്നു. 9,40,441 ആക്ടീവ് കേസുകളാണു രാജ്യത്തുള്ളത്. 51,87,826 പേർ രോഗമുക്തി നേടി. 97,497 പേർക്കു ജീവൻ നഷ്ടമായി.
