സിനിമ തിരക്കുകള്‍ക്കിടയിലും പാലയില്‍ തെരഞ്ഞെടുപ്പ് പ്രടരണത്തിന് ചുക്കാന്‍ പിടിച്ച് സംവിധായകന്‍ ടോം ഇമ്മട്ടി. വരുന്ന നിയമസഭ തെരഞ്ഞെടുപ്പില്‍ പാല മണ്ഡലത്തിലെ ഇടത്പക്ഷ സ്ഥാനാര്‍ത്ഥി ജോസ് കെ മാണിക്കൊപ്പം പ്രചരണ പ്രവര്‍ത്തനങ്ങളില്‍ സജീവമായിരിക്കുകയാണ് മെക്‌സിക്കന്‍ അപാരത സംവിധായകന്‍ ടോം ഇമ്മട്ടി.
തലനാട് പഞ്ചായത്തില്‍ എല്‍ഡിവൈഎഫ് പ്രവര്‍ത്തകര്‍ നടത്തിയ ബൈക്ക് റാലിയിലും മണ്ഡലത്തിലെ വിവിധയിടങ്ങളില്‍ നടക്കുന്ന യുവജന കണ്‍വെന്‍ഷനുകളിലും ടോം ഇമ്മട്ടി യുവാക്കള്‍ക്കൊപ്പം സജീവമായിരിക്കുകയാണ്. കേരള കോണ്‍ഗ്രസ് സ്റ്റുഡന്റെസ് യൂണിയന്‍ പ്രവര്‍ത്തകനായിരുന്ന ടോമിന് പാലായുമായും മാണിയുമായും അടുത്ത ആത്മബന്ധമാണുള്ളത്. പ്രചരണത്തിലുട നീളം ടോം സ്ഥാനാര്‍ത്ഥിയായ ജോസ് കെ മാണിക്കൊപ്പം പ്രചരണ പ്രവര്‍ത്തനങ്ങളില്‍ സജീവമാണ്.
യുവാക്കളുടെ ഹരമായി മായി മാറിയ മെക്‌സിക്കന്‍ അപാരതയുടെ സൃഷ്ടാവ് പ്രചരണ മുന്‍പന്തിയിലുള്ളതിന്റെ ആവേശത്തിലാണ് പാലായിലെ ഇടത് യുവജന പ്രവര്‍ത്തകര്‍. 2017ല്‍ യുവാക്കളെ ആവേശം കൊള്ളിച്ച സിനിമയാണ് ഒരു മെക്‌സിക്കന്‍ അപാരത. ക്യാമ്പസ് രാഷ്ട്രീയത്തിന്റെ കഥ പറഞ്ഞ ചിത്രം യുവാക്കള്‍ ഇരു കയ്യും നീട്ടി സ്വീകരിച്ചിരുന്നു. ചിത്രത്തിലെ ആവേശം കൊള്ളിക്കുന്ന ഗാനങ്ങളും വന്‍ ഹിറ്റായി മാറിയിരുന്നു.
