അഭിനയ മോഹവുമായി സിനിമ പശ്ചാത്തലം ഇല്ലാത്ത ഒരു കുടുംബത്തിൽ നിന്നും സ്വപ്നം കണ്ട ജീവിതം സാക്ഷാത്ക്കരിക്കാനായി ജോലി രാജി വെയ്ക്കുകയും പിന്നീട് സിനിമയിൽ സ്വന്തം കഴിവു തെളിയിക്കുകയും ചെയ്ത നടനാണ് ടൊവിനോ തോമസ്. ബാങ്ക് അക്കൗണ്ടിൽ 100 രൂപ പോലും ബാലൻസ് ഇല്ലാതിരുന്ന ഒരു കാലം തനിക്ക് ഉണ്ടായിരുന്നു എന്ന് തുറന്നുപറയുകയാണ് താരം. ടൊവിനോയുടെ വിവാഹത്തിനുമുൻപ് സഹോദരൻ വിവാഹം കഴിച്ചിരുന്നു. തനിക്ക് യാതൊരു ജോലിയും കൂലിയും ഇല്ലാത്ത സമയത്ത് സഹോദരന്റെ വിവാഹവസ്ത്രം താൻ വാങ്ങിത്തരാമെന്ന് വാക്ക് ടൊവിനോ നൽകിയിരുന്നു. അതെങ്ങനെ വാങ്ങിക്കൊടുക്കും എന്നതിനെപ്പറ്റിയുള്ള ആശങ്ക ഉണ്ടായിരുന്നു. ക്ലബ്ബ് എഫ്‌ എമിന് നൽകിയ അഭിമുഖത്തിലാണ് താരം ഇത് തുറന്നു പറഞ്ഞത്.
വിവാഹ വസ്ത്രം വാങ്ങിക്കാൻ 10000 രൂപയെങ്കിലും ആകും എന്ന് ടോവിനോക്ക് അറിയാമായിരുന്നു. അങ്ങനെ വിഷമിച്ചിരുന്ന അവസരത്തിലാണ് എന്ന് നിന്റെ മൊയ്തീൻ എന്ന ചിത്രത്തിന്റെ അഡ്വാൻസ് ലഭിക്കുന്നത്. അങ്ങനെ താരം ആ വാക്കു പാലിച്ചു. അഭിമുഖത്തിൽ ജീവിതം ഇങ്ങനെയാണെന്നും ചില പ്രതിസന്ധിഘട്ടങ്ങളിൽ നമ്മളെ കൊണ്ട് ചെന്നെത്തിക്കും എന്നാൽ പിന്നീട് ഇരട്ടി മധുരം നൽകും എന്നും താരം പറഞ്ഞു. ജോലി രാജി വെച്ചപ്പോൾ ചെലവുകളെല്ലാം വഹി ച്ചത് ചേട്ടനാണെന്നും ഇഷ്ടമില്ലാത്ത ജോലി ചെയ്യേണ്ട എന്നും പാഷന് പുറകെ പോകാൻ പ്രചോദനം നൽകിയത് ചേച്ചി ആണെന്നും അദ്ദേഹം തുറന്നു പറയുന്നു.
