മലയാളികളുടെ പ്രിയതാര ജോഡികളാണ് നസ്രിയയും ഫഹദ് ഫാസിലും. ബാംഗ്ലൂർ ഡേയ്സിന് ശേഷം ഇരുവരും ഒന്നിക്കുന്ന ചിത്രമാണ് ട്രാൻസ്. ചിത്രം ഫെബ്രുവരി 14ന് തിയറ്ററുകളിലെത്തും. ട്രാൻസ് ഇപ്പോൾ സെൻസർ ബോർഡിൽ നിന്നും കുരുക്ക് നേരിട്ടിരിക്കുകയാണ്. ചിത്രം കണ്ട തിരുവനന്തപുരത്തെ സെന്‍സര്‍ ബോര്‍ഡ് അംഗങ്ങളാണ് ട്രാൻസിന് എതിർപ്പ് പ്രഖ്യാപിച്ചത്. ട്രാന്‍സ് കണ്ട സെന്‍സര്‍ബോര്‍ഡ് അംഗങ്ങള്‍ ചിത്രത്തില്‍ നിന്നും 17 മിനിറ്റോളം ദൈർഘ്യം വരുന്ന സീനുകൾ പൂര്‍ണമായും ഒഴിവാക്കാൻ ആവശ്യപ്പെടുകയും എന്നാൽ സെൻസർ ബോർഡിന്റെ തീരുമാനം ശരിവയ്ക്കാൻ സംവിധായകന്‍ അൻവർ റഷീദ് തയ്യാറാകാതിരിക്കുകയും ചെയ്തു.
ഇതേ തുടർന്ന് സിനിമ മുംബൈയിലെ റിവൈസിങ് കമ്മിറ്റിക്ക് അയച്ചിരിക്കുകയാണ് എന്ന വിവരം ട്രേഡ് അനലിസ്റ്റായ ശ്രീധര്‍ പിളളയാണ് ട്വിറ്ററിലൂടെ അറിയിച്ചത്. സെൻസറിങ് വീണ്ടും നീണ്ടുപോയാൽ ചിത്രത്തിന്റെ റിലീസ് നീളാൻ സാധ്യതയുണ്ട്. എന്നാൽ ചിത്രത്തിന്റെ റിവൈസിങ് കമ്മിറ്റിയുടെ സെൻസറിങ് നാളെ വൈകിട്ട് 3 മണിക്ക് നടക്കും. അൻവർ റഷീദ് സംവിധാനവും നിർമാണവും നിർവഹിച്ച ഈ ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത് അമൽ നീരദ് ആണ്. ഗൗതം മേനോൻ, ചെമ്പൻ വിനോദ്, സൗബിൻ, ദിലീഷ് പോത്തൻ, വിനായകൻ എന്നിവരാണ് ചിത്രത്തിൽ അണിനിരക്കുന്ന മറ്റുതാരങ്ങൾ.
