ലിജോ ജോസ് പെല്ലിശ്ശേരി സംവിധാനം ചെയ്ത ചുരളി ഇന്നാണ് ഒടിടിയിൽ റിലീസ് ആയത്. സോണി ലിവിലാണ് ചിത്രം റിലീസ് ചെയ്തത്. എന്നാൽ, സിനിമ കണ്ടിറങ്ങിയവരിൽ പോസിറ്റീവ് ആയ അഭിപ്രായമുള്ളവർക്ക് ഒപ്പം തന്നെ നെഗറ്റീവ് ആയ അഭിപ്രായങ്ങൾ ഉള്ള നിരവധി പ്രേക്ഷകരും ഉണ്ട്. എ സർട്ടിഫിക്കറ്റ് നേടിയ ചിത്രം പതിനെട്ട് വയസിനു മുകളിലുള്ളവർക്ക് എന്ന് പ്രത്യേകം എഴുതി കാണിച്ച് തന്നെയാണ് ചിത്രം തുടങ്ങുന്നത്. എന്നാൽ, എ സർട്ടിഫിക്കറ്റ് ഉള്ള പടം ഒടിടിയിൽ അനുവദിക്കരുതെന്ന ആവശ്യവുമായി യൂത്ത് കോൺഗ്രസ് രംഗത്തെത്തി.
ഇതിനിടെ ചിത്രത്തിലെ തെറി പ്രയോഗങ്ങൾക്ക് എതിരെ നിരവധി ട്രോളുകളാണ് സോഷ്യൽ മീഡിയയിൽ ഇറങ്ങിയിരിക്കുന്നത്. ഹെഡ്സെറ്റ് ഉപയോഗിച്ച് ഫോണിൽ തന്നെ സിനിമ കാണണമെന്നും അബദ്ധത്തിൽ പോലും ഹെഡ്സെറ്റ് ഫോണിൽ നിന്ന് മാറ്റരുതെന്നും പറഞ്ഞ് നിരവധി പേരാണ് സോഷ്യൽ മീഡിയയിൽ കുറിപ്പ് പങ്കുവെച്ചിരിക്കുന്നത്. ട്രെയിലറിൽ തന്നെ ജാഫർ ഇടുക്കി സഹിതം നിരവധി ആളുകളുടെ തെറിവിളികൾ ട്രോളുകൾ ആയി എത്തിയിരുന്നു. എന്നാൽ, സിനിമ ഇറങ്ങിയതോടെ സിനിമയിലെ ജോജുവിന്റെ തെറിവിളി ആണ് വൈറൽ ആയിരിക്കുന്നത്. ഇതുമായി ബന്ധപ്പെട്ട് നിരവധി ട്രോളുകളാണ് സോഷ്യൽ മീഡിയയിൽ. പെട്രോൾ വിലവർദ്ധനയ്ക്ക് എതിരെ കോൺഗ്രസ് റോഡ് ഉപരോധിച്ച് നടത്തിയ സമരത്തിനെതിരെ ജോജു പരസ്യ പ്രതിഷേധവുമായി രംഗത്തെത്തിയിരുന്നു. ഇതുമായി ബന്ധപ്പെടുത്തിയാണ് ഇപ്പോൾ ട്രോളുകൾ ഇറങ്ങിയിരിക്കുന്നത്.
അങ്കമാലി ഡയറീസ്, ഈ മ യൗ, ജല്ലിക്കെട്ട് എന്നീ സിനിമകൾ മലയാളികൾക്ക് സമ്മാനിച്ച സംവിധായകൻ ലിജോ ജോസ് പെല്ലിശ്ശേരിയുടെ പുതിയ ചിത്രമാണ് ‘ചുരുളി’. ട്രയിലർ റിലീസ് ചെയ്ത് ഒരു ദിവസം കഴിഞ്ഞപ്പോൾ തന്നെ യുട്യൂബിൽ ട്രെൻഡിങ് ആയി മാറിയിരുന്നു. എസ് ഹരീഷാണ് ചിത്രത്തിന്റെ തിരക്കഥ ഒരുക്കിയത്. ജോജു, ചെമ്പൻ വിനോദ്, വിനയ് ഫോർട്ട്, ജാഫർ ഇടുക്കി എന്നിവരാണ് ചിത്രത്തിൽ പ്രധാന വേഷത്തിൽ എത്തുന്നത്.