വിജയ് ബാബുവിന്റെ ഫ്രൈഡേ ഫിലിം ഹൗസ് നിർമിക്കുന്ന പതിനഞ്ചാമത് ചിത്രം പ്രഖ്യാപിച്ചു. വാലാട്ടി എന്നാണ് ചിത്രത്തിന്റെ പേര്. രസകരമായ കാര്യം എന്തെന്നാൻ ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത് നാല് പട്ടികളാണ് എന്നതാണ്. ടോമി, അമലു, കരിദാസ്, ബ്രൂണോ എന്നീ നാല് കഥാപാത്രങ്ങളെയാണ് പട്ടികൾ അവതരിപ്പിക്കുന്നത്. വി എഫ് എക്സിന്റെ സഹായം ഒന്നുമില്ലാതെ യഥാർത്ഥ പട്ടികൾ തന്നെയാണ് ചിത്രത്തിൽ അഭിനയിക്കുന്നത്. നവാഗതനായ ദേവൻ ആണ് ചിത്രത്തിന്റെ സംവിധായകൻ. വിഷ്ണു പണിക്കർ ഛായാഗ്രഹണവും അയൂബ് ഖാൻ എഡിറ്റിംഗും നിർവഹിക്കുന്നു. നവാഗതനായ വരുൺ സുനിൽ ആണ് സംഗീതം.
വിജയ് ബാബു നിർമിച്ച്, മലയാളത്തിന്റെ ആദ്യ ഡയറക്റ്റ് ഒ ടി ടി റിലീസായി പ്രേക്ഷകർക്കിടയിലേക്ക് സൂഫിയും സുജാതയും ഈ ലോക്ക് ഡൗണ് കാലത്ത് എത്തിയിരുന്നു. ജയസൂര്യ, അദിതി റാവു എന്നിവർ പ്രധാന കഥാപാത്രങ്ങളെ അവതരിപ്പിച്ച ചിത്രം ആമസോൺ പ്രൈമിൽ റിലീസ് ചെയ്ത ദിവസം മുതൽ മികച്ച പ്രതികരണമാണ് സോഷ്യൽ മീഡിയയിൽ നിന്നും ലഭിക്കുന്നത്. സൂഫിയുടെയും സുജാതയുടെയും പ്രണയത്തിന്റെ കഥ പറഞ്ഞ ചിത്രത്തിൽ താരങ്ങളുടെ പ്രകടനവും എം. ജയചന്ദ്രന്റെ സംഗീതവും കൊണ്ട് സമ്പന്നമായിരുന്നു.
