കോവിഡ് കാലം തീര്‍ച്ചയായും പ്രതിസന്ധികളുടേതാണ്. എന്നാല്‍ വെല്ലുവിളി നിറഞ്ഞ ഈ സമയത്തേയും ഫലപ്രദമായി ഉപയോഗിക്കുന്നവരുണ്ട്. നടി വീണ നായര്‍ അക്കൂട്ടത്തില്‍ പെട്ടതാണ്. കോവിഡ് കാലത്ത് വീട്ടില്‍ ലോക്കായതോടെ ഫിറ്റ്‌നസ്സിനായി വീണ സമയം കണ്ടെത്തി. 20 ദിവസം കൊണ്ട് വീണ 6 കിലോ ശരീരഭാരമാണ് കുറച്ചത്.
ഏഷ്യാനെറ്റിലെ ‘എന്റെ മകള്‍’ എന്ന സീരിയലിലൂടെയാണ് വീണ അഭിനയത്തില്‍ അരങ്ങേറ്റം കുറിക്കുന്നത്. നിരവധി സീരിയലുകളിലൂടെ ജനപ്രീതി നേടിയ വീണ ജിബു ജേക്കബ് സംവിധാനം ചെയ്ത ‘വെള്ളിമൂങ്ങ’ എന്ന ചിത്രത്തിലൂടെയാണ് സിനിമയിലെത്തുന്നത്. കുട്ടിക്കാലം മുതല്‍ നൃത്തം പരിശീലിക്കുന്ന വീണ സ്‌കൂള്‍ കാലത്ത് കേരള സ്‌കൂള്‍ കലോത്സവത്തില്‍ കലാതിലകമായിരുന്നു.
പിന്നീട് ‘ഒരു സെക്കന്റ് ക്ലാസ് യാത്ര’, ‘മറിയം മുക്ക്’, ‘ചന്ദ്രേട്ടന്‍ എവിടെയാ’, ‘ആടുപുലിയാട്ടം’, ‘വെല്‍ക്കം റ്റു സെന്‍ട്രല്‍ ജയില്‍’, ‘ജോണി ജോണി എസ് അപ്പ’, ‘ഫ്രഞ്ച് വിപ്ലവം’, ‘ഞാന്‍ പ്രകാശന്‍’, ‘തട്ടുംപുറത്ത് അച്യുതന്‍’, ‘നീയും ഞാനും’, ‘കോടതി സമക്ഷം ബാലന്‍ വക്കീല്‍’, ‘ആദ്യരാത്രി’ തുടങ്ങി നിരവധി ചിത്രങ്ങളിലും വീണ അഭിനയിച്ചു.
ബിഗ് ബോസ് സീസണ്‍ രണ്ടിലെ ആക്റ്റീവായ മത്സരാര്‍ഥികളില്‍ ഒരാള്‍ കൂടിയായിരുന്നു വീണ നായര്‍. സ്വാതി സുരേഷ് ഭൈമി (ആര്‍ജെ അമന്‍) ആണ് വീണയുടെ ഭര്‍ത്താവ്. ഒരു മകനും ഇവര്‍ക്കുണ്ട്.
