താഴെത്തട്ടിൽ നിന്നും കഠിനാധ്വാനം കൊണ്ട് ഉയരങ്ങൾ കീഴടക്കിയ നടനാണ് വിജയ് സേതുപതി. ആരാധകരോട് യാതൊരു വിധത്തിലും മോശമായി പെരുമാറാത്ത, അവരെ അങ്ങേയറ്റം സ്നേഹിക്കുന്ന വിജയ് സേതുപതി ആരാധകർക്ക് ഒപ്പം ഫോട്ടോക്ക് ചെയ്യുമ്പോൾ അവർക്ക് കവിളിൽ ഒരു ചുംബനം കൊടുക്കുന്നത് പതിവാണ്. ചുംബനത്തിന് പിന്നിലെ ആ രഹസ്യം പങ്ക് വെച്ചിരിക്കുകയാണ് അദ്ദേഹം ഇപ്പോൾ. മനോരമയുമായുള്ള അഭിമുഖത്തില്ലാണ് സെല്‍ഫിയെടുക്കാന്‍ വരുന്ന ആരാധകരെ ചുംബിക്കുന്നത്തിന്റെ രഹസ്യം അദ്ദേഹം പറഞ്ഞത്.
തമിഴ്‌നാടു പോലെ തന്നെയാണ് എനിക്ക് കേരളവും. ഇവിടുത്തെ ആളുകളെയും എനിക്ക് വളരെ ഇഷ്ടമാണ്. മലയാള സിനിമകള്‍ കണ്ടാണ് ഞാന്‍ വളര്‍ന്നത്. പണ്ട് ചെന്നൈയിലെ ഒരു വീഡിയോ ഷോപ്പില്‍ നിന്ന് മോഹന്‍ലാല്‍ സാറിന്റെയും മമ്മൂട്ടി സാറിന്റെയും സിനിമകളുടെ കാസറ്റ് ചോദിച്ചു വാങ്ങി വീട്ടില്‍ പോയി കാണുമായിരുന്നു. അതു പോലെ കമല്‍ഹാസന്‍ സാറിനെയും വലിയ ഇഷ്ടമായിരുന്നു. ഇവരുടെ സിനിമകള്‍ കണ്ടാണ് ഞാന്‍ അഭിനയം പഠിച്ചത്.
കുറെ കാലം മുമ്പ് രണ്ട് ആരാധകരാണ് ഇങ്ങോട്ട് ചുംബനം ആവശ്യപ്പെട്ടത്. അന്ന് അവര്‍ അതിന്റെ ചിത്രം എടുത്ത് ഫെയ്‌സ്ബുക്കിലും ട്വിറ്ററിലുമൊക്കെ ഇട്ടു. അത് അങ്ങനെ വൈറലായി. പിന്നീട് എല്ലാവരും കാണുമ്പോള്‍ ചുംബനം ചോദിച്ചു തുടങ്ങി. സ്‌നേഹം പങ്കുവെയ്ക്കും തോറും കൂടുമെന്നാണ് ഞാന്‍ വിശ്വസിക്കുന്നത്. ഇവിടെയും അതു തന്നെയാണ് സംഭവിച്ചത്.
സനല്‍ കളത്തില്‍ സംവിധാനം ചെയ്യുന്ന മാര്‍ക്കോണി മത്തായിയിലൂടെ മലയാളത്തിൽ അരങ്ങേറ്റത്തിനായി ഒരുങ്ങുകയാണ് അദ്ദേഹം. ജയറാമും ചിത്രത്തിൽ നായക കഥാപാത്രത്തെ അവതരിപ്പിക്കുന്നു. സജന്‍ കളത്തില്‍ ഛായാഗ്രഹണം നിര്‍വഹിക്കുന്ന ഈ ചിത്രത്തിന്റെ തിരക്കഥയും സംഭാഷണവുമെഴുതുന്നത് സനില്‍ കളത്തില്‍, റെജീഷ് മിഥില എന്നിവര്‍ ചേര്‍ന്നാണ്. സത്യം സിനിമാസിന്റെ ബാനറില്‍ പ്രേമചന്ദ്രന്‍ എ. ജിയാണ് ചിത്രം നിര്‍മ്മിക്കുന്നത്. ആത്മീയയാണ് ചിത്രത്തിലെ നായിക. ചിത്രം ഈ മാസം 11 ന് ചിത്രം തിയേറ്ററുകളിലെത്തും.
