പ്രണവ് മോഹന്‍ലാല്‍, കല്യാണി പ്രിയദര്‍ശന്‍ എന്നിവരെ കേന്ദ്ര കഥാപാത്രങ്ങളാക്കി വിനീത് ശ്രീനിവാസന്‍ സംവിധാനം ചെയ്യുന്ന പുതിയ ചിത്രമാണ് ഹൃദയം. മായാനദിയിലൂടെ ശ്രദ്ധേയയായ ദര്‍ശന രാജേന്ദ്രനും പ്രധാന വേഷത്തില്‍ എത്തുന്ന ചിത്രത്തിനായുള്ള കാത്തിരിപ്പിലാണ് ആരാധകർ. ഷൂട്ടിംഗ് പുരോഗമിച്ചുകൊണ്ടിരിക്കുന്ന ഈ ചിത്രത്തിന്റെ ഒരു ലൊക്കേഷൻ ചിത്രം ഇപ്പോൾ വിനീത് ശ്രീനിവാസൻ പങ്കു വച്ചിരിക്കുകയാണ്. ചിത്രത്തിലെ താരങ്ങൾക്കും അണിയറപ്രവർത്തകർക്കും ഒപ്പമുള്ള ഒരു ചിത്രമാണ് വിനീത് ശ്രീനിവാസൻ സോഷ്യൽ മീഡിയയിൽ പങ്കുവെച്ചിരിക്കുന്നത്.
ചിത്രത്തിനൊപ്പം താരം നൽകിയ ക്യാപ്ഷനും ഇതിനോടകം ശ്രദ്ധ നേടിയിരിക്കുകയാണ്. ചിത്രത്തിൽ പ്രണവ് മോഹൻലാൽ ഉണ്ടെന്നും അദ്ദേഹത്തെ കണ്ടു പിടിക്കാമോ എന്നുമാണ് വിനീത് ശ്രീനിവാസൻ ചോദിച്ചിരിക്കുന്നത്. താരത്തിന്റെ പോസ്റ്റിനു താഴെ നിരവധി കമന്റുകളുമായി ആരാധകരും എത്തിയിട്ടുണ്ട്. 17 വയസ്സ് മുതലുള്ള ഒരു ചെറുപ്പക്കാരന്റെ ജീവിതമാണ് ഈ ചിത്രത്തിൽ അവതരിപ്പിക്കുന്നത് എന്ന് വിനീത് ശ്രീനിവാസൻ വ്യക്തമാക്കിയിരുന്നു.
