മിന്നൽ മുരളിക്കായി കാലടിയിൽ ഒരുക്കിയ സെറ്റ് ഒരു കൂട്ടം വർഗീയ വാദികൾ തകർത്തത് ഏറെ പ്രതിഷേധത്തിന് ഇടയാക്കിയിരിക്കുകയാണ്. നാളത്തെ കേരളത്തെ കുറിച്ച് ഏറെ ആശങ്ക ഉണർത്തുന്ന ഈ പ്രവർത്തിക്കെതിരെ ഒട്ടുമിക്ക മലയാളികളും ഒരേ പോലെയാണ് പ്രതികരിച്ചിരിക്കുന്നത്. അതിനിടയിൽ ഇതിനെല്ലാം പിന്നിൽ നിർമാതാക്കളായ വീക്കെൻഡ് ബ്ലോക്ക്ബസ്റ്റേഴ്‌സും അതിന്റെ സാരഥി സോഫിയ പോളുമാണെന്ന് ഒരു ഓൺലൈൻ മാധ്യമം റിപ്പോർട്ട് ചെയ്തിരുന്നു. നിർമാതാവിനെയും പ്രൊഡക്ഷൻ കമ്പനിയേയും അപകീർത്തിപ്പെടുത്തുന്ന രീതിയിൽ വ്യാജവാർത്ത നൽകിയ ഓൺലൈൻ മാധ്യമത്തിനെതിരെ നിയമനടപടിയുമായി മുന്നോട്ട് പോകുവാണ് നിർമാതാക്കൾ ഇപ്പോൾ. നമ്പി നാരായണൻ കേസിൽ നീതിക്ക് വേണ്ടി നിലകൊണ്ട് വിജയം കുറിച്ച് ഹൈക്കോടതി അഡ്വക്കേറ്റ് സി ഉണ്ണികൃഷ്ണനാണ് നിർമാതാക്കൾക്ക് വേണ്ടി കേസ് വാദിക്കുന്നത്. വ്യാജവാർത്ത പങ്ക് വെച്ച് നിർമ്മാതാക്കളെ അപകീർത്തിപ്പെടുത്തിയ ആർ ജെ നീനക്കെതിരെയും വീക്കെൻഡ് ബ്ലോക്ക്ബസ്റ്റേഴ്സ് നിയമനടപടിക്ക് ഒരുങ്ങുന്നുവെന്നാണ് അറിയുവാൻ കഴിയുന്നത്. ഓൺലൈൻ മാധ്യമത്തിനെതിരെ നിയമനടപടിയുമായി മുന്നോട്ട് പോകുന്നുവെന്ന് വീക്കെൻഡ് ബ്ലോക്ക്ബസ്റ്റേഴ്സ് തന്നെയാണ് പ്രേക്ഷകരെ അറിയിച്ചിരിക്കുന്നത്.
ഞങ്ങളുടെ മാനേജിങ് ഡയറക്ടർ ശ്രീമതി സോഫിയ പോളിനെയും വീക്കെൻഡ് ബ്ലോക്ക്ബസ്റ്റേഴ്സ് എന്ന ഞങ്ങളുടെ പ്രൊഡക്ഷൻ കമ്പനിയേയും വളരെയധികം അപകീർത്തിപ്പെടുത്തുന്ന ഒരു വ്യാജവാർത്ത ഒരു ഓൺലൈൻ ന്യൂസ് പോർട്ടൽ പങ്ക് വെച്ചതായി ശ്രദ്ധയിൽപ്പെട്ടു. വളരെ സങ്കീർണമായ സാഹചര്യത്തിലൂടെയാണ് നമ്മൾ എല്ലാവരും തന്നെ ഇപ്പോൾ കടന്ന് പോകുന്നത്. ഈ ഒരു സമയത്ത് ഇത്തരത്തിലുള്ള അപവാദങ്ങളും അടിസ്ഥാനമില്ലാത്ത കുറ്റാരോപണങ്ങളും ഒരിക്കലും അനുവദിച്ചു കൂടാത്തതാണ്. ഇന്നേ വരെ, പ്രത്യേകിച്ചും ഈ ദിവസങ്ങളിൽ ഞങ്ങൾക്ക് പിന്തുണയുമായി നിൽക്കുന്ന ഓരോരുത്തരോടും ഞങ്ങൾ ഏറെ കടപ്പെട്ടിരിക്കുന്നു. വരും ദിവസങ്ങളിലും നിങ്ങളുടെ ആ പിന്തുണ ഞങ്ങൾ ഏറെ ആഗ്രഹിക്കുന്നുണ്ട്.
വ്യാജവാർത്ത നൽകിയ ആ ഓൺലൈൻ പോർട്ടലിന് എതിരെ ഞങ്ങൾ നിയമപരമായി നീങ്ങുവാൻ ഒരുങ്ങുകയാണ്. സമൂഹത്തിന് ആപത്കരമാകുന്നതും വെറുപ്പ് പടർത്തുന്നതുമായ ഇത്തരം വ്യാജവാർത്തകൾ ദയവായി ഷെയർ ചെയ്യരുതെന്ന് പ്രിയ പ്രേക്ഷകരോട് അപേക്ഷിക്കുന്നു.
കുറ്റവാളികൾക്ക് എതിരായ നിയമനടപടികൾ മുന്നേറുകയാണ്. ഈ കേസിന് നീതിപരമായ ഒരു വിധിയുണ്ടാവുമെന്ന് പ്രതീക്ഷിക്കുന്നതോടൊപ്പം ഇത്തരം സംഭവങ്ങൾ നമ്മുടെ നാട്ടിൽ അംഗീകരിക്കപ്പെടില്ലെന്നും പ്രതീക്ഷിക്കുന്നു.
ബാംഗ്ലൂർ ഡേയ്സ്, മുന്തിരിവള്ളികൾ തളിർക്കുമ്പോൾ, പടയോട്ടം, കാട് പൂക്കുന്ന നേരം തുടങ്ങിയ പ്രേക്ഷകരുടെ പ്രിയ ചിത്രങ്ങൾ നിർമ്മിച്ച വീക്കെൻഡ് ബ്ലോക്ക്ബസ്റ്റേഴ്‌സിന്റെ ഏറ്റവും പുതിയ ചിത്രമാണ് മിന്നൽ മുരളി. മലയാളത്തിലെ ആദ്യ സൂപ്പർഹീറോ ചിത്രമായ മിന്നൽ മുരളിയുടെ സംവിധാനം കുഞ്ഞിരാമായണം, ഗോദ എന്നീ സൂപ്പർഹിറ്റ് ചിത്രങ്ങൾ ഒരുക്കിയ ബേസിൽ ജോസഫും നായകനായി എത്തുന്നത് പ്രേക്ഷകരുടെ പ്രിയ യുവതാരം ടോവിനോ തോമസുമാണ്.
